2 mil ka OFW papaulion sa Pilipinas

CEBU, Philippines - Gibana-bana nga may kapin kun kulang 2,000 ka  mga  trabahanteng  Filipino (OFW) nga  gikan  sa Syria  ang  i-repatriate  kon papaulion sa kagamhanan  nganhi  sa nasud karon. Kini sumala  ni  Reynaldo Jacalan sa Overseas Workers Welfare Administration (OWWA) atol sa Kapihan sa PIA nga  gipalanog sa DYMR  kagahapon.

Matud pa  ni Jacalan  nga ning  maong  gidaghanon 18 ka OFW nga taga Cebu ang rehistrado sa ilang  buhatan, apan  sa  wala  marehistro  nga trabahante  wala na maihap.

Matud  pa ni Jacalan  nga  gihimo  sa kagamhanan  ang  pinugos  nga  pagpapauli  sa tanang  Filipino  nga  tua  sa Syria  tungod  sa warning sa America  nga  bombahan  ang  maong  nasud. Gipasabot  ni Jacalan  nga ang  OWWA  mohatag  og  mga  proteksyon  sa  mga  OFW  nga  mahiabot  dinhi  sa nasud.

Pipila  sa mga  proyekto nga  giandam  sa OWWA  mao  ang  mga bahin  sa panginabuhi.

Kutob  sa  OFW  nga  mahiabot  dinhi  sa nasud  basta rehistrado  lamang  sa OWWA,  hatagan  sa  maong  buhatan  og  tag-P10 mil isip  abag  kanila sa ilang  panginabuhi.

Kining  maong  kantidad  maoy  gisaad  sa OWWA  ngadto  sa mga dokumentado  nga  OFW. Miingon  siya  nga matag  OFW  nga  moadto  sa gawas mobayad  og P1,800  nga registration fee  sa OWWA. Kini  wala  na  maghisgut  kun pila  ka tuig  ang  iyang  kontrato didto  sa gawas.

Ang OWWA  kaabag  sa Philippine Overseas Employment  Administration (POEA) ug Department of Labor (DOLE)  sa paglista  sa  mga  manarbaho  sa gawas  sa nasud. (BANAT NEWS)