Vital installation sa Lapulapu gibantayan

CEBU, Philippines - Gipangandaman  sa kapolisan  sa dakbayan  sa Lapulapu ang  mga  mahinungdanong instalasyon  sa maong  dapit  gumikan sa kagubot  ug  kaguliyang sa dakbayan  sa Zamboanga.

Ang  maong  mga instalasyon  naglakip sa oil depot, Mactan Cebu International Airport, duha ka tulay, mga dagkong  hotel, mga beach resort ug  uban  pang  suroyanan  sa mga  turista. Wala mohatag  og kompiyansa ang kapolisan sa maong dakbayan  bisan  layo ra   sa  Zamboanga   diin  kasamtangang  nag-engkwentro  ang mga sakop sa militar ug Moro National Liberation Front (MNLF).

Matud pa ni Lapulapu City Police Office Director P/SSupt. Rey Lyndon Lawas   nga  ilang  nasuta  karon  pinaagi  sa ilang  mga sakop  sa intelligence  nga  walay mga dautang kalihukan ilang nabatyagan palibot sa dakbayan sa Lapulapu.

Miingon  si SSupt. Lawas   nga  nalipay  ra  siya gumikan sa maayong relasyon nila sa mga Muslim community sa dakbayan sa Lapulapu ilabi na sa mga bag-ong salta sa ilang komunidad.

Hinuon walay kompiyansa si Lawas sa sitwasyon  didto sa Mindanao   busa  labing  gipalig-on  ang  pagbantay  niini  sa  mga    vital installations sa dakbayan sa Lapulapu. Matud pa ni SSupt. Lawas  nga  dako ang iyang pagtuo  nga dili mokatap  sa tibuok   nasud ang nahitabo didto sa Mindanao. Labaw  sa tanan  dili  kini  mahitabo dinhi sa lalawigan  sa Sugbo, matud  niya. (BANAT NEWS)