CEBU, Philippines - Gilaraw karon sa City Traffic Operations Management (CITOM) nga magbutang og pocket lanes isip hustong lugar aron kahunungan sa mga jeepney units.
Matud ni CITOM executive director Atty. Rafael Christopher Yap, duna na sila’y nakit-ang mga dapit diin mamahimong gamiton isip pocket lanes.
Dugang niya, kasagaran niini nahimutang sa mga luna nga gipanag-iya sa gobyerno tungod kay sayon ra sabuton ugaling i-emplimentar na.
Gitumbok usab nga kining mga lugara mamahimo nang gamiton isip pocket lanes sulod sa unom ka buwan.
Ang pocket lane ang dapit nga sumpay sa main highway tupad sa sidewalk diin mohunong ang mga jeepney aron mopakanaug ug mopasakay.
Gawas niini, plano usab sa CITOM nga hingusgan ang mag-implementar sa ordinansa sa dakbayan sa Cebu nga nagmando sa mga motorista nga magdala og chalk aron kun ugaling maaksidente sila, ang drivers na mismo ang momarka sa dalan diin nahitabo ang aksidente dayong padaplin sa sakyanan aron dili makabalda sa dagan sa trapiko.
“With the advent of camera phones, motorists can take a photo of the site even and submit it to us. With this, vehicle can be removed so that normal traffic flow will not be affected. They can do this even before the enforcers arrive,†si Yap mipasabot.
Plano usab sa CITOM nga mohimo ug seminars alang sa mga interesado nga city department heads, media, ingon man ang taga fiscal’s office aron sila ma-deputize sa maong opisina.
“These people will be deputized to issue citation tickets provided they attend the seminar and pass written exams,†dugang ni Yap.
Samtang, gi-defer una sa CITOM Board atol sa bag-o niining meeting ang hangyo sa mga jeepney operators sa Mandaue nga sila tugtan sa pagbiyahe sa downtown Cebu city matag gabii.
Pasabot ni Yap, huwaton una ang Metro Cebu traffic master plan una pa desisyunan sa board ang maong hangyo sigon sa nasabutan sa meeting. (BANAT NEWS)