COPS awardee sa LCPO luwas na sa peligro

CEBU, Philippines - Luwas na gikan sa peligro ang kahimtang ni SPO2 Rodito Viovicente ang Country Outstanding Policemen in Service (COPS) awardee nga giatake sa sakit sa kasingkasing didto sa kaulohan aron unta sa pagdawat sa iyang pasidungog  kagahapon gikan sa Metrobank Foundation.

Matud pa ni Lapulapu City Police Office Director Sr. Supt. Rey Lyndon Lawas nga personal mibisita ni SPO2 Viovicente mikumpirmar nga anaa na sa luwas nga kahimtang ang iyang sakop base sa gitug-an kaniya sa doktor nga nag-atiman niini sa St. Lukes Medical Center.

Hinoon kinahanglan pa niya  ang padayong treatment ug therapy aron dali ang recovery niini. Si Viovicente na-stroke samtang padung mokuha sa iyang uniporme nga gipalabada diha sa Camp Crame niadtong milabay’ng adlaw. Ang asawa niyang si Melodina Viovicente  maoy midawat sa plaque ug P300 mil cash atol sa awarding ceremony sa Metrobank Foundation didto sa kaulohan.

Mapasalamaton usab si Lawas ngadto sa Metrobank Foundation nga miabag sa gastohan sa tambalanan lakip na si Mayor Radaza nga mipadala og P100 mil, PNP -7 Regional Director Chief Supt. Danilo Constantino nga P25 mil  ug P10 mil  gikan sa pag-amotanay sa mga kaubang polis ni Viovicente diha sa LCPO. (/EIM) (BANAT NEWS)