CEBU, Philippines - Naapil sa pagkapaig ang usa ka 40- anyos nga dunay deperensiya sa pangisip samtang samdan usab ang inahan niini nga misuway sa pagluwas kaniya sa dihang miulbo ang dakong sunog kagahapon sa buntag sa Sitio Lutao, Barangay Estaca, Compostela. Dose usab ka panimalay ang naugdaw sa maong insidente.
Matud pa nga nanglaba si Luciana Mahinay, 60, sa dihang nakadungog kini og sipa nga buto gikan sa sulod sa iyang panimalay hinungdan nga iya kining gisusi apan mao na lang ang iyang nakita nga midako na ang kalayo.
Gisuwayan sa pagluwas ni Luciana ang anak nga si Joy, 40, nga iyang gikadenahan sa sulod sa kwarto sa ikaduhang andana sa panimalay apan tungod sa kainit napakyas kini.
Si Luciana nakaangkon og paso human matagaki og baga sa iyahang tuong abaga. Si SFO2 Tomas Piñas, imbestigador sa Compostela Fire Station, mibutyag nga posible nga electrical defect ang hinungdan sa maong sunog.
Ang mga naugdaw nga 12 ka mga balay pulos ginama sa light materials. Matud ni Luciana, nga ang main electrical switch sa ilang panimalay depektoso apan dili sigurado si Piñas kung gitarung ba kini sa pag-ayo sa electrician sa miaging semana.
Ang kabomberohan wala usab makaresponde dayun human misuway pa unta ang mga residente sa pagpawong sa kalayo sa kaugalingong paningkamot una pa sila mitawag sa fire station.
“Nagtinabangay pa sila og pawong pero paminaw nila nga murag dili na kaya mao pay pagpanawag og bombero,†butyag ni Piñas.
Ang kahagip-ot sa lugar usa usab sa nakapalangay sa kabomberohan nga gikinahanglan pa nila nga isumpay-sumpay ang ilang fire hoses aron pag-abot sa nasunugan nga gibana-bana adunay 15 ngadto sa 20 metros ang gilay-on gikan sa nahimutangan sa fire trucks.
“Mga 15 to 20 meters siguro gikan sa fire truck unya rough road pa gyud,†matud ni Piñas. Giisa sa first alarm ug nakontrolar sulod sa pito ka minutos ang sunog sa wala pa mapawong mga alas 9:00 sa buntag. Ang danyos mikabat sa P300,000.
Matud ni Piñas nga si Joy 20 ka tuig na nga nag-antos sa sakit sa pangisip nga maoy hinungdan nga nahunong kini sa pagtrabaho isip production worker sa Mactan Export Processing Zone (MEPZ).
Matud pa nga nagsakit ang ulo ni Joy kaniadto apan wala lang niya kini tagda hangtod milanat na og usa ka semana una siya naka-desider nga magpatan-aw sa doktor. Apan ingong grabe na ang iyang sakit ug wala na matambali pa. (BANAT NEWS)