CEBU, Philippines - Duha ka sitio sa Barangay Agsungot sa dakbayan sa Sugbo gikategorya nga mga dapit nga humok modahili ang yuta.
Kini ang giklaro ni Dr. Eddie Llamedo, tigpamaba sa Department of Environment and Natural Resources (DENR-7) kinsa miila sa mga sitio Lower Agsungot ug Lintuwang nga adunay rate nga 1:10,000-scale sa ilang gipahigayon nga geohazard assessment and mapping.
Matud pa ni Llamedo nga ang maong mapping gihimo sa upat ka membro nga team gikan sa Mines and Geosciences Bureau (MGB-7).
Gipasabot ni Llamedo nga ang posibleng hinungdan sa kahumok sa yuta sa maong mga lugar mao ang lungagon na nga tipo sa yuta diin motuhop gayud ang kusog nga bundak sa uwan nga mugna sa bagyo.
Samtang sa bahin ni DENR-7 Regional Executive Director Dr. Isabelo Montejo, kini miingon nga ang geohazard mapping usa sa mga prayoridad nga programa ni Presidente Benigno Aquino III ug ni DENR Secretary Ramon JP Paje.
Base sa Philippine Development Plan kini gitumong aron minus ra ang epekto sa pagdahili sa yuta ug baha sa mga nagkalain-laing komunidad sa nasud.
Apan sa bahin usab ni MGB-7 Regional Director Loreto Alburo siya miingon nga ang ilang gipahigayong assessment sa Barangay Agsungot konpirmado sukad sa nangaging appraisal nila niadtong tuig 2009 sa scale nga 1:50,000 bahin sa mga lugar nga humok og yuta .
Tambag ni Alburo sa mga tawo nga nanimuyo sa maong dapit nga kinahanglang mopalayo una sila hangtod nga ang awtoridad modeklarar nga luwas na nga kapuy-an ang maong mga sitio. (BANAT NEWS)