Gikan sa inom namatay

CEBU, Philippines - Nakit-an nga patay  na  ang  usa ka  ulitawo sa atbang  sa tindahan  nga  iyang  giinoman  didto sa  sitio Cotcoton, Barangay Sta. Filomina, lungsod sa Alegria  sa milabay nga gabii.

Ang maong lalaki nailhan nga si Mario Amante Velita, 48, ulitawo,  nga molupyo sa maong  lugar.

Nasayran  sa Banat News  gikan  sa Cebu Provincial Police Office   nga nakadawat og tawag ang Alegria Police station bahin  sa  tawong  nagbuy-od nga patay  na didto  sa maong  lugar.

Dali nga merespondi  sila  si PO1 Edward Sagun, PO1 Jeol Padin ug PO1 Kenneth Aviso sa lugar nga nahimutangan sa namatay.

Basi sa  pasiunang imbistigasyon  nasuta  sa mga  polis  nga ang biktima nakig-inom sa iyang mga higala sa maong lugar apan miuna kini og lakaw samtang nagpadayon pa ang grupo sa pagtagay   hangtud   sa alas 11:00 ang takna sa  gabii.

Gipukaw sa iyang kauban nga si Rannel Emiliano Palomar ang biktima sa pagtuo nga natulog lamang kini apan wala na gyud ni momata.

Dali  kini  nilang gihatud ngadto sa  Reinhard Wirgen Memorial Hospital apan  gideklarar nga patay na dihang nahidangat kini sa maong tambalanan. (Bryner Diaz/WC)   

Dul-an 60 mil misalmot sa Alay Lakad

Dul-an sa 60,000 ka tawo  ang misalmot sa Alay Lakad Walk for a Cause kagahapon gikan sa New Imus Road ug mitapos didto sa parking lot sa SM  diin gipahigayon ang pormal nga pagbukas  sa maong programa.

Ang maong kalihokan gisalmotan sa mga magtutungha sa elementarya,  high school, ug  sa kolehiyo sa nagkalain-laing pampubliko ug pribadong tunghaan sa dakbayan sa Sugbo.

Nagsugod ang  lakaw sa alas 6:00 gikan  sa New Imus road sa buntag  paingon ngadto sa SM.

Matud pa ni Alay Lakad Cebu Foundation Incorporated (ALCFI) Executive Chairman Steve Norman Tan nga nahinabi sa Banat News nga nagbunga gayud ang ilang  paningkamot nga kasuportahan ang ilang kalihokan tungod kay wala sila’y puas sa pagsuporta sa mga magtutungha nga iyang gipaabot nga mosalmot niini.

Dugang pa niya nga kining maong tinuig nga kalihokan  dako kaayo og ikatabang ngadto sa mga Alay Lakad scholars  aron masustentohan ang ilang pinansyal nga problema sa pagtungha.

Gipadayag ni Tan nga taas kaayo ang ilang preparasyon niining maong programa apan wala gayud sila magmahay tungod kay sa matag tuig nga ila kining gipahigayon wala man usab mokunhod ang gidaghanon sa mga partisipante.

Usa  sa  hinungdan  niini  mao ang paghatag og dakong tabang sa mga magtutudlo sa pag-aghat sa magtutungha nga mosalmot ug mohatag og donasyon.

Samtang si Anie Suico nga usa sa mga social worker sa Department of Social Welfare and Services (DSWS) nga mitabang sa pagpangolekta sa mga donasyon mitug-an sa Banat News nga adunay mikabat sa P386,582  nga donasyon ang ilang nakuha gikan sa mga misalmot  nga  naglakip  sa kagamhanan sa dakbayan sa Sugbo.

Dugang pa ni Suico nga ang ubang parte niining maong donasyon ilang nakuha gikan sa tag P10 nga bayad sa ticket sa mga misalmot sa maong kalihokan.

Malaumon ang ALCFI nga sa sunod pang mga katuigan unta susamang suporta gihapon ang ibubo sa mga nagpakabana niini.

Nahuman ang maong kalihokan sa alas 10:00 ang takna sa buntag kagahapon. (BANAT NEWS)