Lakaw sa Alay Lakad karong adlawa

CEBU, Philippines -  Andam  na  ang  tanan  alang sa Alay Lakad program  nga  ipahigayon  didto  sa SM City, Cebu sa north  reclamation  area,  barangay  Mabolo ning  dakbayan  sa Sugbo  karong buntag.

Kini  ang  gipahibawo  kagahapon  ni  Steve Norman M. Tan, Executive Director sa Alay Lakad Cebu Foundation  Inc. sa Kapihan sa PIA .

Gibutyag  ni  Tan  nga  mokabat  sa 80,000  ang  mipadayag  nga  mosalmot  ning  kalihukan  nga  maglakaw ug  mobayad  og P10 matag  usa.

Ang  Alay  Lakad  magpahigayon  og tinuig  nga  kalihukan alang  sa proyekto nga  scholarship  niini.

Matag tuig  mohatag  og  libre  nga  tuition  sa  iyang  mga  scholar  ang  Alay Lakad  nga  P10,000  alang sa college, P3,000 ug P500 nga school  supplies  alang  sa high school  ug P2,500 ug P500  nga school  supplies  alang  sa elementarya.

Hinuon  sa college  scholarship, duha  ra  ka eskuylahan  ang  paeskuylahan  niini  nga  mao  ang  Cebu Technological  University  ug  Cebu Normal College.

Gipasabot  ni  Tan  nga  ang    kwalipikasyon  sa madawat  nila  nga  scholar  mao  kadtong  mga  estudyanteng  utokan  ug  wala  nay  ikaabot  sa  paggasto  ang  mga  ginikanan  alang  sa kurso  nga  kuhaon  niini  sa kolehiyo.

Hinuon  gawas  nga ang  mga  estudyante  mismo  maoy  pabut-on  sa kurso  nga  kuhaon  niini,  gipatuman  usab  sa  Alay Lakad  ang  pamaagi  nga  mamentinar  sa hingtungdan  ang  85 porsento  nga  grado  matag  tuig.

Gibutyag  ni  Tan  nga  sila  mismo  ang  moadto  sa matag  balay  sa irekomendar  sa principal  sa tulunghaan  nga  patabangan.

Ilang  sutaon  kun  unsa  ang  panginabuhi  sa  mga  ginikanan  aron matino  nga  angay  silang  tabangan.

Sa laing  bahin  gibutyag  ni  Tan  nga  higpit  kaayo  ang  pag-amping  sa kinitaan  matag  tuig  sa Alay Lakad  pinaagi  sa mosalmot  sa programa  nila nga  lakaw  apan  may  bayad.

Kini  aron  sa pagsiguro  nga  limpyo  ug  way  mausik  nga  paningkamot  sa foundation  alang  sa pagtabang  sa  mga  estudyante  nga angay  tabangan.

Sa laing  bahin  gipasalig  usab  ni Atty Christopher  Yap , director  sa CITOM  nga  luwas  ang  mosalmot  sa maglakaw  paingon  sa SM  karong  Domingo.

Ang assembly  time  mao  ang  alas 5:00  sa buntag  sa New Imus  road  ug  magsugod  ang  lakaw  sa alas 6:00  sa buntag  paingon  sa SM.

Matud  pa ni  Yap  nga  giusab  nila  ang  rota  sa  mga  pasaheroang  jeep  nga  moagi  sa maong lugar aron  walay  makabalda  sa  mga  maglakaw.

Ang  maong  lakaw  salmotan  sa  mga  estudyante, mga  ginikanan,  propesyonal  ug  tanan  nga  may  labot  sa  pagpakabana  alang sa kaayohan  sa mga  estudyante nga  kabus. (BANAT NEWS)