PDEA midili pagbaligya sa poppy seeds

CEBU, Philippines - Gipasidan-an sa Philippine Drug Enforcement Agency (PDEA) ang mga establisemento nga ihunong na ang paggamit sa opium poppy seeds sa ilang menu ug ubang produktong gibaligya  ngadto  sa publiko.

Si PDEA Director General Undersecretary Arturo G. Cacdac  Jr. nagkanayon nga ang  maong pasidaan  maoy  isip suporta sa lakang sa Food and Drug Administration (FDA) human matino nga may  mga supermarket ug groceries,  nga  namaligya  gihapon  og  food dressing ug dip product nga adunay opium poppy seeds.

Gipasabot  ni Usec  Cacdac   nga  ang Opium Poppy o bisan unsang parte sa tanom nga naggikan sa species Papaver somniferum L.; Papaver setigerum DC, Papaver orientale, Papaver bracieatum ug Papaver rhoeas, nalakip sa 1961 United Nations Single Convention on Narcotic Drugs nga gi-amendahan sa 1972 protocol.

Midugang  si  Cacdac  nga niadtong una, ang poppy seeds gigamit isip active palliative ingredient sa paghimo og pastries, salads ug uban pang sangkap sa paghimo og cake.

Gani  miingon  siya  nga  kini ang  hinungdan  nga misaka ang panginahanglan sa maong gidiling  drugas  nga gigamit isip ingredient sa pagluto, partikular sa salad dips ug dressings.

Nagkanayon  si  Cacdac  nga base sa Section 4, Article II sa Republic Act 9165, gilatid  niini  nga adunay silot sa pag-import sa maong  peligrong  tambal o Controlled Precursors ug Essential Chemicals nga pagkabilanggo sa tibuok kinabuhi ug piyansa nga P500,000. hangtud P10,000,000. lakip,  ang bisan unsang mga species sa opium poppy o parte niini nga gigamit isip dekorasyon   ug sa          pagluto.

Giawhag  sa PDEA ang publiko nga i-surrender ang bisan unsang produkto nga adunay poppy seeds sa   labing   duol nga PDEA o FDA regional offices. (BANAT NEWS)