CEBU, Philippines - Nagtingkagol sa karsel ang managsuon human kini makuhai og ginadiling drugas pasado alas-5 sa miaging hapon atol sa buy-bust operation nga gihimo sa mga sakop sa Philippine Drug Enforcement Agency diha sa sitio Sario barangay Bulacao dakbayan sa Sugbo.
Ang mga nasikop mao ang managsuong Stanley Iran, 22, ug Andrio Iran, 27, mga molupyo sa maong dapit.
Ang tigpamaba sa PDEA-7 nga si Jessie Tabanao mitug-an nga dugay na silang nakadawat sa maong taho hinungdan nga ila kini nga gipaubos sa surveillance hangtod nga ila kini nga gipaubos sa buybust operation.
Nakuha gikan sa managsuon ang 143 ka gagmay’ng pakete sa gituohang shabu, ang duha gikonsiderar nga level 3 drug pusher.
Wala hinuon mohimakak ang duha sa pasangil tungod kay matud nila mao kini ilang gihimong panginabuhian aron ipakaon sa ilang pamilya tungod sa kalisod. (/EIM) (BANAT NEWS)