Ceres buses paesplikaron

CEBU, Philippines - Gihatud na sa Land Transportation and Regulatory Board-7 ang "show cause order" ngadto sa Ceres Liner  aron paesplikaron kun nganong naaksidente ang ilang bus didto sa Talaga, Argao nga mikalas og usa ka kinabuhi ug miangol sa laing siyam ka mga sakay niini lakip ang drayber ug konduktor.

Sa pakighinabi sa Banat Manobela kang Atty. Evelyn Carmelita Misal, sa LTFRB mipadayag kini nga wala pa maabot sa punto nga ilang suspendihon ang franchise sa Ceres bus tungod usab kay ipaubos pa kini sa hearing.

Matud niya show cause order una ang ilang ipaabot ngadto sa Ceres  aron ilang mapasabot ang LTFRB kun nganong dili sila angayang suspensuhon.

Gipadayag pa ni Misal nga karung umaabot Septiyembre 2 ning tuiga ipahigayon ang hearing.

Pahimangno ni Atty. Misal ngadto sa mga operator sa bus nga unta dili usa kini modawat og driver  nga walay klarong trainings ug mga clearances.

Si LTFRB-7 director Ahmed Cuizon nagkanayon nga ang suspensyon maglakip sa mga bus nga nasakop sa franchise case number 09-3511 o kadtong nagbiyahe sa Cebu City-Santander via Oslob-Moalboal nga rota diin masakop ang nalimbuwad nga bus.

Suspensuhon unya kini og 30 ka adlaw alang sa road worthiness inspections aron pagsigurong walay mga depekto ang ilang mga bus.

Ang Ceres Liner adunay 253 ka mga bus nga nagbiyahian sa nagkadaiyang mga rota sa probinsya sa Sugbu apan duna silay kapin sa 2,000 ka mga bus pasaheroan sa tibuok nasud.

Ang suspensyon pinasubay kini sa bag-ong patakaran sa LTFRB nga kung dunay masugamak sa aksidente nga pasaheroan, ang tanang kaubang bus niini sa prangkisa suspensuhon alang sa mandatory road worthiness test.

Sa karaang patakaran ang tanan gyung bus sa usa ka kompanya maoy suspensuhon apan giusab kini niadtong Hunyo 11, 2011.

Ang nakalas sa maong aksidente mao si Ma. Teresa Ceballos nga usa ka midwife sa Moalboal District Hospital human naipit sa bus. Samtang ang drayber nga si Ernest Zerna kinsa naangol usab gikatakdang buhian kagahapon kung wala gyu’y mosang-at og kaso batok kaniya.

Ang Kapitolyo nanginlabot na sa maong aksidente ug miawhag sa tagdumala sa kompanya nga ipaabaga sa insurance sa bus ang galastuhan sa mga nabiktima sa aksidente.

Ang hepe sa Provincial Social Welfare and Development Office nga si Evelyn Senajon nakigtagbo kagahapon sa mga kadagkoan sa Ceres Liner aron maatiman dayon ang panginahanglang medical sa mga nangaangol. (BANAT NEWS)