Mananagat nga missing nakit-an patay na

CEBU, Philippines - Patay  na   nga  nakit-an  ang  usa ka  mananagat  kinsa  gideklarar  nga  missing  sa  pila  ka adlaw  human  kini  maabti  og  unos samtang  nangisda didto sa kadagatan sa barangay Guiwanon sa lungsod sa Bantayan isla sa Bantayan  sa miaging  buntag.

Ang napalgang patay mao si Benjamen Maroliano Sr., 49, nagpuyo sa Sitio Sayaw, barangay Bantigue, usa   ka mananagat.

Si PO3 Jesus Aguisanda sa Bantayan Police  Station mibutyag  sa Banat News  nga nanagat ang  biktima  niadtong  Agosto 24, Sabado  sa buntag.

Wala  na  kini  mahiuli  sa  ilang  balay  sukad  niadto  apan  niadtong  Lunes,  Agosto 26, napalgan  kining patay  na  ug  gidagsa  sa daplin  sa baybayon  sa barangay  Guiwanon, Bantayan. Si Anthony Maroliano, 26, nga  pag-umangkon  sa biktima   mibutyag  sa kapolisan  nga nakit-an niya kini  sa natikyaob  niyang  pumpboat  human hapaka  sa dagko nga  bawod dala   sa kalit  nga  unos.

Midugang  si Maroliano  nga  iyang  gisuwayan  og  sawom  ang  biktima  apan  kalit kining nawala  kay  naigo  usab  sa dagkong  bawod  ug didto wala na niya kini igkita.

Gituohan nga nalumos kini ug  namatay  hinungdan  nga  gidagsa  sa baybayon   ug  napalgan sa mga molupyo sa barangay Guiwanon.  Hinuon  gitambagan  sa kapolisan  ang  pamilya  nga  ipa-autopsy  ang  patay’ng  lawas  niini  pagsuta  kun  nalumos  ba  o  gipanamastamasan. (BANAT NEWS)