CEBU, Philippines - Ang dakbayan sa Sugbo gilupig na sa siyudad sa Naga kabahin sa pagpangolekta og buhis gikan sa mga real properties kon kayutaan, building ug makinarya.
Sigun sa report sa Bureau of Local Government-Finance (BLGF) nga ang Naga nag-una sa Real Property Tax Collection Efficiency kay mikolekta kini og P252.4 milyones imbis P52.1 milyones ra maoy target niini sa miaging tuig.
Nahibaw-an nga sa tuig 2011, ang Naga mao usab ang nag-una sa Real Property Tax Collection Efficiency kay samtang mi-target sila’g koleksyon nga P51.5 milyones, ang iyang nakolekta P269.3 milyones.
Sa wala pa mag-No. 1 ang Naga hapit mangiwit ang maong bag-ong dakbayan kay didto ra kini mahimutang sa ika-13 nga dapit sa 16 ka mga siyudad sa Central Visayas. Ang iyang koleksyon niadto P30 milyones ra.
Ang dakbayan sa Sugbo nga usa ka highly-urbanized city maoy sagad panaminan sa ubang dakbayan sa Central Visayas, nahimutang na lang sa ika-11 nga dapit sa miaging tuig. Kun tan-awon ang koleksyon sa dakbayan sa Sugbo, daku kaayo ang P672.3 milyones apan wala kini makaabot sa gi-target niini nga P825 milyones kaniadtong 2012.
Nabantayan hinoon nga misaka og gamay ang collection efficiency sa dakbayan sa Sugbo kay ika-13 kini kaniadtong 2011 tungod kay mikolekta lang ang dakbayan og P670 milyones ug wala makaabot sa target nga P781 milyones.
Ang dakbayan sa Sugbo adunay kapin sa 240,000 ka Real Property Units (RPU)s apan matud ni Assistant City Assessor Liezl Gonzaga nga ang City Treasurer’s Office mohimo lang og bana-bana sa ilang koleksyon gikan sa 65 porsento sa kinatibuk-ang RPU’s, apan bisan pa niini dili nila makolekta ang tanan.
Ang BLGF miingon nga kun ayuhon lang sa pagpangolekta ang buhis gikan sa real properties sigurado nga dili magkalisud-lisud ang usa ka local government unit. Apan dinhi sa dakbayan sa Sugbo dugay na nga wala kahimoi og General Revision ang tax rates sa mga yuta ug building.
Si Mayor Michael Rama supak nga usbon ang rate kay matud pa mosaka ang buhis.
Gusto ni Rama nga ang “revalidation†sa mga properties maoy paspasan aron kadtong mga tag-iya sa mga property nga girehestro isip residential apan gigamit sa commercial maoy pabayron og daku. (BANAT NEWS)