Tulo nadakpan sa anti-illegal drugs operations

CEBU, Philippines - Nagtingkagol sa karsel ang tulo ka tawo human masikop atol sa managlahing operasyon sa mga sakop sa City Intelligence Branch ug Investigation and Detective Management Branch sa miaging gabii.

Ang mga nasikop mao silang Restiel March Mullanida Amigable, 23, taga  barangay Pasil; Joanrey Alfeche ug ig-agaw niining si Milyren Alfeche. Pasado alas-10 sa miaging gabii, ang mga sakop sa IDMB mipahigayon og saturation drive sa interior portion sa M. Dela Conception sa Suba Pasil.

Tuod man,samtang mipahigayon sila sa dapit og pakisusi ilang nasigpatan si Amigable nga kadudahan ang lihok ug dihang gisitar giingong mi-aksyon kini og dagan hinungdan nga kini gikuptan ug sa ilang pagsusi aduna kini usa ka gamay’ng box nga adunay sulod nga gagmay’ng pakete sa gituohang shabu.

Si Amigable wala motubag dihang gipangutana sa mga tigbalita bahin sa nakuhang ilegal nga drugas nga 27 ka pakete sa maong box. Pagka-alas 11  sa gabii, ang buhatan sa CIB nakasikop sa manag-agaw nga giingong nalambigit sa pagpamaligya og ginadiling drugas sa Unit 3 Carbon Market.

Si Sr. Insp. Wyne Magbanua ang deputy chief for administration mipadayag nga nakadawat sila og impormasyon nianang pagkahapon sa operasyon sa manag-agaw’ng Alfeche.

Narekober sa kapolisan ang lain pang 32 ka gagmay’ng paketeng shabu ug laing duha ka dagkong pinutos sa gituohang shabu nga tag P20 mil ang usa ka putos gawas sa napalit nga usa ka bulto nga balor P25 mil.  Si Joanrey nagdumili paghatag komento sa pasangil, apan ang iyang ig-agaw nga si Milyren mihimakak  sa alegasyon. (BANAT NEWS)