SBMI nagsugod na og imbestigar

CEBU, Philippines - Subling gibarugan sa duha ka mga kapitan ang ilang mga nahaunang pamahayag sa gisumitir nilang tagsa-tagsa ka marine protest atol sa pagsugod na sa Special Board of Marine Inquiry kabahin sa pagkalunod sa MV St. Thomas Aquinas niadtong Biyernes sa gabii.

Ang SBMI gipangulohan ni Commander Gilbert Rueras sa Philippine Coast Guard (PCG) kinsa mipatawag nila ni MV St. Thomas Aquinas Capt. Renan Bermejo ug MV Sulpicio Express Siete Capt. Rolito Gilo.

Si Bermejo miinsister nga iyang gikontak ang Sulpicio Express Siete pagkakita niyang nagsubay kini sa inbound lane nga mao unta iyang agian, apan giingong walay nitubag niini gamit ang channel 16, ang iyang barko nagdagan og 15 knots ug usa ka milya ang gilay-on gikan sa Sulpicio Express.

Apan uwahi na siyang nakabantay nga lisod nang pahunongon ang St. Thomas Aquinas tungod kay walo ka minutos pa una pa hingpit nga mohunong ang pagtuyok sa propellers niini.

“Dahil sa Sulpicio, hindi na ako naka-reduce (speed),” matud pang Bermejo. Upat ka minutos sa wala pa sila magkabangga nakit-an niya ang pula nga suga sa Sulpicio Express maong miliko siya sa wala, ang pula nga suga nagpasabot nga moliko sa tuo samtang ang green sa wala.

Apan matud pa pagliko ni Bermejo sa wala misuway siya og maniobra sa tuo aron makalikay sa pagbangga apan naabtan gyud sila sa cargo ship.

Apan emosyonal nga gisupak ni Capt. Gilo ang pamahayag ni Bermejo,matud niya nga ang passenger ship maoy kalit nga miusab sa iyang  direksyon sa gilay-ong 0.4 nautical miles taliwala nilang duha.

Matud niya nagtuo siyang moliko sa tuo ang St.Thomas Aquinas tungod kay nagpasiga kini og pula nga suga. Giinsister usab ni Gilo nga sa outbound lane siya nagsubay sukwahi sa pasangil ni Bermejo.

“Because of rapidness of her (2GO) action, I was not able to execute avoidance course,” matud ni Gilo.

Lakip sa gipatawag sa SBMI mao ang kapitan sa Trans Asia Nine nga si Capt. Galipher Ian Faller kinsa mipalig-on sa pamahayag sa kapitan sa 2GO nga barko.

Gikatakdang ipatawag usab ang lain pang mga kapitan sa mga gagmay’ng fastcrafts nga giingong diha sa hitabo apan wala manumbaling sa aksidente nga mao man unta ni ang protocol o balaod nga kinahanglang motabang sila kung dunay malunod. (/EIM) (BANAT NEWS)