Katabang sa panimalay moparehistro sa barangay

CEBU, Philippines - Gimando  sa kagamhanan  nga tanang  katabang  sa panimalay  kun  Kasambahay  moparehistro  sa  ilang  tagsa-tagsa  ka  barangay.

Si  Assistant Regional  Director  Elias  Fernandez Jr. sa Department of Interior and Local Government (DILG)7 mibutyag  nga  sila  ang gitahasan  sa  pagporma  og  mga  sumbanan  alang  sa maong  rehistrasyon.

Sa tulumanon  AGIO Forum  nga  gipalanog  sa DYMR,  gipahayag  ni  Fernandez    ang  kamahinungdanon  nga  marehistro  ang  matag  usa  ka katabang sa panimalay  o Kasambahay aron  maprotihian  sa kagamhanan  ang  ilang  katungod.

Sumala  sa balaod sa Kasambahay  Law,  ang  mga  katabang  sa  panimalay mao  kadtong  mga  tawo  nga  mitrabaho  sulod  sa panimalay  nga  may relasyon  sa  iyang  panarbaho, mahimong  live-in  o  kaha  live-out.

Kini  naglakip  sa  matang  sa ipatrabaho  kaniya,  mahimong tigbantay sa bata o yaya, kusinero/kusinera, hardeniro,  labandira  o kinsa  mang mga  tawo  nga   gipatrabaho  sa  mga  trabahuon  sa sulod  sa balay  isip  maoy  iyang  panginabuhi.

`Hinuon   way  labot  niini  kadtong  mga  family  driver,   service  provider  o kansang  trabaho  matawag  nga  pang-okasyon  lamang.

Sumala  ni  Fernandez  nga  base  sa balaod  katungod  sa kapitan  sa barangay  o  kaha  mayor  sa lungsod  ug  siyudad  nga  mopahibawo sa  mga amo  nga  mangunay  sa pagparehistro  sa ilang  mga  katabang.

Miingon  si  Fernandez  nga  ang  maong  gimbuhaton  usa  ka mapadayunon  nga  trabaho  sa barangay  busa  nagkinahanglang  motudlo  ang  kapitan  og  Kasambahay  Desk  officer  nga  maoy  mobantay  sa Kasambahay  Desk.

Sumala  ni  Fernandez  ang  mga  porma  nga  Kasambahay Registration Form  ug  ang  Kontrata  sa Paglilingkod  sa Tahanan  anaa  sa  mga  kapitan  sa  barangay  ug  sa  mga  mayor  sa siyudad  ug  lungsod.

Matud  pa ni Fernandez  nga  segun  sa balaod  ang  matag  Kasambahay Desk officer  maoy  tahasan  sa paghipos  sa master list sa  mga  Kasambahay  uban  sa  ilang  mga  kontrata.

Kadtong  mga  kontrata  nga  mabahas  na  ipahibawo  dayon  sa amo  ngadto  sa barangay desk officer, sumala  ni Fernandez. (/WC) (BANAT NEWS)