CEBU, Philippines - Manghimoay og paltik nakaipsot sa buy-bust operation nga gipahigayon sa Regional Special Operations Group didto sa sitio Capotatan, barangay Ginacot dakbayan sa Danao sa alas 3:30 sa hapon sa miaging adlaw.
Matud sa taho sa kapolisan nga nagpahigayon og buy-bust operation ang mga sakop sa RSOG batok ni Rolando Capuyan alyas Lando ug lain pang duha ka mga kauban niini nga giingong manghimoay og armas. Apan giingong nakabantay ang mga suspek sa RSOG ug daling gibiyaan ang ilang payag-payag sa ilang buhatanan og armas.
Nakuha gikan sa payag-payag nga gihimoan sa mga paltik ang mga nagkadaiyang taas nga kalibre sa armas, pyesa ug uban pang mga gamit sa pagpanghimo sa armas.
Nakuha usab ang upat ka KG9 submachine pistols nga walay serial number, duha ka Ingram machine pistol, usa ka magazine sa Ingram, napulo ka wala pa mahuman nga magazine sa KG9, duha ka metal handle ug usa ka silencer alang sa KG9.
Dugang pa niini nakuha usab ang usa ka wala pa mahuman nga AR15 cal. 9 mm machine pistol, tulo ka wala pa mahuman nga KG9s, duha ka magazine springs, ug uban pang kagamitan sa pagbuhat sa mga paltik. Bisan nakaipsot ang tulo, pasakaan gihapon sila sa RSOG 7 og kasong kalapasan sa Republic Act 8294. (BANAT NEWS)