500 ka mananagat nakadawat og hinabang gikan ni Samsam

CEBU, Philippines - Si Kongresista Gerald Anthony “Samsam” Gullas uban  ni  Bokal Julian Daan  nanghatag   og kinilong  bugas  ug  delatang mga  pagkaon  sa  500 ka mga  mananagat  sa barangay Tanke, dakbayan  sa Talisay  niadtong Lunes.

Ang  mga  mananagat  sa  maong  lugar  natataw  nga  apektado  sa panginabuhi  gumikan sa  pagkalunod sa  MV Thomas  Aquinas  nga gidasmagan  sa MV Sulpicio Express 7  niadtong  Biyernes  sa gabii.

 Ang Tanke usa sa mga coastal barangay sa Talisay ug kasagaran sa mga residente sa maong lugar nagsalig sa pagpanagat. Human sa nahisgutang trahedya ang mga mananagat nangreklamo  tungod kay wala’y mamalit sa ilang kuha nga mga isda.

Si Gullas nagkanayon  nga nagpasalamat siya nga naatol nga wala’y sesyon  sa Kongreso hinungdan nga migahin gyud siya og panahon uban kang Daan sa pagsuroy sa mga apektadong konstituwente sa iyang distrito aron  motunol og hinabang.

Sa laing bahin, si Konsehal Valeriano Ylanan mipalabang  og resolusyon kagahapon sa buntag sa pagdeklara nga ipaubos sa state of calamity ang mga coastal barangay nga apektado sa nahisgutang insidente sa kadagatan.

Ang maong resolusyon ni Ylanan giaprobahan kagahapon sa buntag sa konseho  naghatag usab kini sa pagtugot sa pagpagawas og pundo gikan sa calamity fund nga ihinabang ngadto sa mga apektado sa trahedya . (BANAT NEWS)