CEBU, Philippines - Nakakita og igong basehan ang Cebu City Prosecutor’s Office sa pagpasaka sa kaso batok kang Charlie Parba, kinsa gituuhang usa ka level two drug pusher sa korte.
Si Parba, 34, taga Barangay Tisa, Cebu City gikasohan og kalapasan sa Section 5 (illegal selling of drugs) ug Section 11 (illegal possession of drugs) sa Republic Act 9165.
Matud ni assistant city prosecutor Gandhi Truya nga human ni mi-waived si Parba sa iyang katungod sa pagtubag sa maong kaso pinaagi sa pag-file og counter-affidavit, iya kining gidali pag-file sa korte.
Way piyansang girekomendar ang piskalya sa iyang kaso. Kahinumduman nga niadtong Agosto 14, 2013, sa alas 9:10 sa gabii gidakop sa mga sakop sa Philippine Drug Enforcement Agency (PDEA)-7 si Parba pinaagi sa buy-bust operation. Si Parba giingong usa sa mga watchlist sa PDEA. Nakuha gikan kaniya ang walo ka dagkong paketeng shabu, 12 medium packs ug 54 small packs nga shabu nga balor og P250,000.
Ang akusasyon gihimakak ni Parba apan miangkon siyang mamaligyaay siya og shabu apan dili siya level two pusher ug labaw nang wala siya madakpi pinaagi sa buy-bust operation tungod kay giimbitar lang siya ug pagkahuman gipaangkon kaniya ang drugas nga giladlad na diha sa ilang balay sa Tisa. (BANAT NEWS)