CEBU, Philippines - Usa ka lalaking miduaw sa higalang priso ang gidakop human nasakmitan og siyam ka linikit nga pinaugang dahon sa marijuana diha sa Danao City Jail alas-5 pasado ang takna sa hapon niadtong miaging adlaw.
Ang suspetsado giilang si Jordan Oliveros Ostria, taga barangay Poblacion sa maong dakbayan. Si PO1 Faron Avila sa kapolisan sa maong dakbayan nga nahinabi sa Banat News miingon nga miduaw si Ostria sa pagbisita sa nabilanggo niining higala.
Apan dihang girekisa kini ni JO3 Jose Alejandro Hortesano ug JO2 Guillermo Indig namatikdan ang nagburot sa ilawom sa brief niini.
Dihang gipaablihan sa mga jailguards ang nagburot nga bahin sa brief sa suspek nasuta ang walo kini ka mga stick nga linikit sa pinaugang dahon sa marijuana.
Gikatakdang pasakaan og kasong kalapasan sa Republic Act 9165 kon Comprehensive Dangerous Drug Act of 2002 ang suspek karong adlawa. (BANAT NEWS)