CEBU, Philippines - Si Senior Superintendent Patrocinio Comendador Jr. mubiya na isip direktor sa Cebu Provincial Police Office human siya makadawat og kopya sa order gikan sa Camp Crame adtong miaging adlaw.
Apan sa pagkakaron wala pa masayod si Comendador kung asa siya ibalhin kay wala pa ang iyang order.
Temporaryo una siyang madestino sa Police Regional Office (PRO)-7 samtang nagpaabot sa iyang sunod nga assignment.
Ang order epektibo kini sugod kagahapon apan ang pormal nga turnover pagahimuon karong Lunes sa CPPO.
Si Comendador hulipan ni Sr. Supt. Noel Gillamac, hepe sa Regional Personnel and Human Resource and Development Division (RPHRDD).
Si Comendador miserbisyo sa CPPO sulod sa duha ka tuig ug lima ka buwan human siya napili ni former Gov. Gwendolyn Garcia adtong Abril 2011.
Nahimo usab nga Cebu City Police Office director si Comendador niadtong Enero 2, 2007 hangtod sa August 31, 2010.
Siya maoy kanhi hepe sa Regional Investigation and Detective Management Division (RIDMD). Usa sa dakong accomplishment ni Comendador mao ang kaso ni Ellah Joy Pique, 6, kinsa gi-kidnap dayun gipatay adtong Pebrero 8, 2011. Ang lawas sa biktima nakit-an sa pangpang sa lungsod sa Barili.
Ang eleksyon usab mao ang usa sa pinaka-challenging nga panahon sa pamunuan ni Comendador.
“Nalipay ko nga walay stand off and no one died during election aside sa way kuryente before sa akong pagsugod ug sakyanan nga dili mudagan,†matud niya.
Ang CPPO nahimong Best Provincial Anti-Illegal Drugs Operating Team ug ikaduha sa pinakadaghang armas nga nakumpiska sa tibuok nasud.
“In all the things we do, we should aim for the best,†matud niya. (Ria Mae Booc/EIM)
Opisyal sa DOLE-7 gikombikto tungod sa pagpangilkil
Gikombikto kagahapon sa korte si Wilfredo Wagas, hearing officer sa Department of Labor and Employment (DOLE)-7 sa salang direct bribery.
Sa walo ka pahina nga desisyon ni Judge Raphael Yrastorza sa Regional Trial Court Branch 14, siya miingon nga dunay paigo ug lig-ong ebidensya batok sa maong kanhi opisyal. Si Wagas gisentensyahang mabilanggo og lima ka tuig ngadto na sa unom ka tuig. Gawas sa pagkapriso, gimandoan siya nga pabayron og P36,000 nga multa.
Kahinumduman nga niadtong Abril 18, 2011, si Wagas gipasanginlang nangilkil sa negosyanteng si Johnie Lim og balor P12,000 aron ibasura niini ang labor case nga gipasaka sa lima ka empleyado ni Lim.
Matud pang Lim, tungod kay gibati siya og kasagmuyo sa gibuhat ni Wagas iyaha kining gisumbong kang Department of Trade and Industry Provincial Director Nelia Navarro, kinsa mao say misumbong ngadto kang DOLE-7 Regional Director Exequiel Sarcauga.
Si Sarcauga mao miawhag ni Lim nga ma-entrap si Wagas nga miresulta sa pagkasikop niini niadtong Mayo 5, 2011.
Si Wagas mihimakak sa pasangil batok kaniya ug gibasol ang reklamante nga mao man unta’y miduol kaniya aron magpatabang. Ang abogado ni Wagas nga si Salvador Solima nagkanayon nga mo-file sila og motion for reconsideration ug kung sila balibaran ilaha kining iduso sa Court of Appeals hangtud nga maabot sila sa Korte Suprema. (/EIM) (BANAT NEWS)