CEBU, Philippines - Naputol ang unta kalipay sa usa ka pamilyang mangaligo unta sa Molobolo sa Tuburan human nalimbuwad ang ilang gisakyang Toyota hilux pick-up pasado alas 7 kagahapon sa buntag diha sa sitio Buli sa barangay Cansumoroy lungsod sa Balamban.
Ang mga naangol mao silang Marvin Lalican, 25, taga Barangay Quiot; Reztie Almocera, 30, molupyo sa Basak- San Nicolas; Israel Rona, 27, ug Chromwell Rona, 18, nga pulos molupyo sa Barangay Mambaling ug ang driver niini nga si Cathlyn Mae Singson, 27, sa dakbayan sa Lapu-lapu.
Samtang ginagmay nga pangos ug bun-og usab ang naangkon nila ni Harold Dominique Silagdo, 21, molupyo sa Basak-San Nicolas; usa ka nailhan lang sa ngalang Kenneth; Maria Lourdes Rona, 29; iyang anak nga si Lord Justin Rona, 6; Jeffrey Villamor, 25, ug ang iyang anak nga walo pa ka bulan nga si Peter Andrei Villamor, pulos taga Barangay Mambaling.
Matud pa sa nakakita nga si Hely Claros dihang nahinabi sa Banat News nga didto pa lang sa imabaw nga bahin sa maong dapit gikatahong gisenyasan na ang driver nga nagkayo ang iyang ligid.
Misuway unta sa paghunong ang maong sakyanan apan tungod kay dulhugon wala na mogana ang brakes niini hinungdan nga giliko kini ni Singson sa daplin apan nalimbuwad na hinuon sila.
“Sus, pwerte gyud nakong syagita kay kita man ko’g kalayo, miana gyud ko nga Tubig! Tubig! Tabang mo kay nagkalayo na!†padayag pa ni Claros.
Dali usab sila si Claros nga nangayo og tabang sa kapolisan aron usab daling mahatod sa Balamban District Hospital ang mga nangaangol.
Dako ang pasalamat nilang Claros ug molupyo sa dapit nga wala gayuy bisan usa ka bata ug residente sa dapit nga naangin tungod kay niadtong higayona adunay daghang bata nga nagbaklay daplin sa karsada patubang sa tunghaan.
“Mapasalamaton na lang gyud tawon mi nga walay naigong lain labi na bata kay sus! Unsaon na lang ug naay bata, daghan baya to’g bata ganina nagbaklay padung eskuylahan,†pasabot pa ni Claros. (/EIM) (BANAT NEWS)