CEBU, Philippines - Pasirad-an lang una ang dalan sa sitio MACV sa barangay Agsungot sa siyudad sa Sugbu human nasuta sa inspeksyon nga miliki ang yuta nga gikahimutangan sa maong dalan kagahapon.
Ang maong dalan natabunan og yuta nga midahili gikan sa kilid sa bukid niadtong Martes ug dili na maagian og motorista.
Si Konsehal Dave Tumulak sa Reduce Danger Zone (ReDZ) miingon nga human sa ilang inspeksyon uban sa mga sakop sa barangay officials ug City Disaster Risk Reduction Management Office aduna sila’y nadiskubrehang usa ka tiil nga “tension crack†o liki sa yuta duol sa landslide site.
Nagpadayon ang clearing operations sa CDRRMO gamit ang ekipo sa city engineering sama sa payloader ug backhoe loader nga maoy naghakot sa yuta nga midahili ingon man ang pagbungkag sa tension crack aron kalikayan ang dugang pang landslide labi na ning panahon sa ting-ulan.
Gawas sa Agsungot, laing landslide usab ang miigo sa Sitio Binaliw 3, barangay Binaliw diin mitabon usab sa karsada apan dali ra kining nalimpyohan sa barangay ug CDRRMO.
Samtang ang Department of Environment and Natural Resources (DENR), human ang geohazard assessment mapping mirekomendar sa permanenteng pagpabakwit sa mga lumulupyo sa piling lugar sa barangay Binaliw ug Agsungot human masuta nga dako kaayo ang kahigayonang modahili ang yuta sa maong mga lugar.
Sa pagtuon sa Mines and Geosciences Bureau (MGB) sa DENR 7, tulo ka sitio sa barangay Binaliw lakip na sa sitio Binaliw 3, Mansawa, ug Campo ingon man duha ka sitio sa Agsungot sama sa sitio Lower Agsungot ug Lintuwang ang gitumbok nga landslide prone area ug dili haom puy-an.
Ang Division for Welfare of Urban Poor (DWUP), pinaagi sa pangulo niini nga si Atty. Collin Rosell mibutyag nga dunay bakante nga relocation site sa barangay Pit-os kun ugaling ipahigayon ang permanent evacuation sa mga apektadong residente sa duha ka barangay.
Ang mayor miingon nga sa dili pa hukman ang permanenteng pagpahawa sa mga residente sa lima ka sitio nga landslide prone, makigpulong una siya kang Tumulak, DWUP ug DENR aron tukion ang angayang lakang aron walay kinabuhi nga maapektahan panahon sa landslide. (/EIM) (BANAT NEWS)