CEBU, Philippines - Napaig ang usa ka 46- anyos nga lalaki nga naapil sa pagkasunog sa gipuy-ang apartment diha sa Felicitas compound sa dalan Plaridel sa barangay Looc, dakbayan sa Mandaue alas 7:05 ang takna sa miaging gabii.
Si SFO3 Roy Codilla sa Bureau of Fire Protection (BFP) sa dakbayan sa Mandaue nga nahinabi sa Banat News miila sa namatay nga mao si Anthony Farri, 46, giingong adunay kabilinggan sa pangisip nga nagpuyo sa maong dapit.
Matud pa ni SFO3 Codilla nga ang maong apartment gipanag-iya ni Vinky Sevilla ug nag-abang ang pamilyang Farri. Ang igsuong lalaki sa biktima misuway unta pagluwas kaniya gikan sa second floor apan napakyas tungod sa kadali sa pagkuyanap sa kalayo.
Gibanabang mokabat sa P200,000 ang gibiling danyos sa sunog nga milanat og kinse minutos una pa nakontrolar.
Si SFO1 Ceferiano Codilla, imbestigador sa BFP sa maong dakbayan miingon giisa ngadto sa Task Force Alpha (TFA) ang maong alarma, wala hinuon maglisod ang kabomberohan tungod kay duol ra ang apartment sa fire station ug daplin ra usab kini sa dalan. Matud pa ni Codilla nga giputlan na og kuryente ug migamit na lang og kandila panahon sa gabii. (BANAT NEWS)