CEBU, Philippines - Nangreklamo ang mga barangay kapitan sa lungsod sa Dumanjug gumikan sa kadaghang mga nagparehistro alang sa umaabot eleksiyon sa barangay ug Sangguniang Kabataan karong Oktobre bisan dili mga residente sa ilang barangay.
Usa niini si Kolabtingon barangay kapitan Bartolome Luab nagpatabang kang Mayor Nelson Garcia human wala notaryohi sa usa ka abogado ang iyang reklamo nga isang-at unta sa buhatan sa Commission on Elections. Ang abogado giingong nagpailang sakop sa Liberal Party maong dili siya makanotaryo sa reklamo ni Luab kinsa kaalyado ni Garcia sa One Cebu.
“Gibalibaran ang kapitan kay LP kuno siya nga abogado. Unsa man diay iyang gipanumpaan nga pagka-abogado?†matud pang Garcia.
Gipugngan sa Banat News ang pangan sa maong abogado sanglit dili motubag sa iyang cellphone.
Apan si Garcia miingon nga ang maong abogado alyado ni Bise-Mayor Efren Guntrano “Gun-gun†Gica sa LP kinsa anak ni Atty. Edgar Gica. Dili usab motubag si Bise Mayor Gica sa iyang cellphone.
Si Garcia mitambag kang Luab nga mangita na lang og laing abogado gawas sa Dumanjug nga makanotaryo sa iyang reklamo.
Nagduda si Garcia nga adunay plano ang LP nga padag-on gyud ang daghan nilang kandidato sa pagka-kapitan maong nanghakot sa taga laing lugar aron moparehistro.
Kini aron usab pagseguro sa lingkuranan sa Association of Barangay Councils sa konseho sa lungsod.
Matud pa ni Garcia nga gawas ni Luab, daghan pa sa mga kapitan ang may susamang reklamo nga wala pangitai og dokumento nga mopamatuod nga residenti gyud sa barangay ang nagparehistro sa niaging semana sa Comelec. (/EIM) (BANAT NEWS)