CEBU, Philippines - Usa ka lalaki ang nadiskubrehang patay na sa sud sa balay pasado alas 9:00 sa buntag kagahapon diha sa Sitio Upper Torre sa barangay Inayawan ning dakbayan sa Sugbo.
Ang biktima nailhan nga si Trifon Bacalso Jr., 47, buwag sa asawa ug nag-inusara na lang nga nagpuyo sa ilang balay.
Giingon nga ang biktima gitigbas sa usa ka Joselito Abatayo, 53, silingan niini sa maong dapit.
Si SPO3 Rogelio Nedamo sa Pardo Police Station 7 nga nakahinabi sa Banat News miingon nga ang patay’ng lawas napalgan sa mga igsuon atol sa pagbisita nila kagahapon sa buntag diha sa balay niini.
Matud pa sa usa ka Esmeraldo Estores ang mitug-an sa mga imbestigador nga nakita niini ang biktima ug suspek niadtong Agosto 7 adlaw nga Miyerkules nga naglalis sa gawas sa balay sa biktima.
Giingong gipasanginlan sa suspek si Bacalso nga maoy mi-tirador kaniya ug tungatunga sa ilang panaglalis mikuha og bolo ang suspek ug gitigbas ang biktima sa makadaghang higayon. Ang biktima nakadagan sa sulod sa balay ug nitago didto.
Base sa imbestigasyon sa kapolisan ang maong biktima namatay tungod sa mga samad niini ug wala madala dayon sa tambalanan.
Kasamtangan nga nagtingkagol sa Cebu City Police detention cell ang maong suspetsado nga gidakop sa followup operation. (Sibyl Pacaña USJR Intern/EIM) (BANAT NEWS)