Nagduwa’g kinatawo tupad sa policewoman

CEBU, Philippines - Bugnaw nga rehas sa prisohan karon ang gihinol-hinol sa usa ka maintenance technician human kini gidakop sa usa ka policewoman human kini giingong nagduwa sa iyang kinatawo tupad sa maong babayeng polis sud sa bus pasaheroan.

Ang pag-aresto nahitabo diha sa barangay Liong sa lungsod sa Dumanjug kagahapon sa alas 8:30 sa buntag samtang ang bus nagbiyahe padung sa maong lungsod gikan sa siyudad sa Sugbu.

Ang gidakop tungod sa pagbinastos mao si Michael Oyngorin, 35, nagpuyo sa Alanbihod sa lungsod sa Argao ug maintenance technician og mga videokihan.

Si PO1 Roda Singson, molupyo sa lungsod sa Badian apan nadestino sa Lapu Lapu City Police Station luwan sa maong bus ug tupad sa suspek sa lingkuranan.

Matud ni PO3 Dionesio Tagupa sa Dumanjug Police Station dihang nahinabi sa Banat News  gikan pa sa duty si PO1 Singson ug paingon na kining mopauli sa lungsod sa Badian  sakay sa Ceres Bus gikan sa South Bus Terminal.

Sumala pa nga samtang nagbiyahe tupad sa suspek, nabantayan ni PO1 Singson ang suspek nga nagtan-aw og sex video scandal sa iyang cellphone unya magpunay usab og pasiplat kaniya. Matud pa nga nag-sibilyan lang si PO1 Singson niadtong tungora ug nagsuot lang og shorts ug t-shirts.

Sumala pa ni Tagupa, dangtan ang pila ka gutlo giablihan sa suspek ang iyang pundiyo  ug kalit lang nga giduwaan ang iyang kinatawo bisan dunay mga pasaherong nakakita lakip na si PO1 Singson.

Giingong gihuwat lang gyud ni PO1 Singson nga matungod  sila sa police station una niya kini dakpon, apan wala na kini makapaabot pa tungod kay layo pa ang police station mibarog ang maong polis ug gitionan og armas ang suspek dayong paila nga siya polis. Ang suspek nahingangha na lang ug daw gibuboan og bugnaw nga tubig ug gisirad-an ang iyang pundiyo. Gimandoan ni PO1 Singson si Oyngorin sa pagkanaog  sa bus.

Naatol usab nga mao puy pag-agi ni SPO2 Saul Alejandria nga taga lungsod sa Dumanjug ug nadestino sa Naga City Police nga padung nang mouli luwan sa iyang  motorsiklo ug gipangayoan og tabang ni PO1 Singson aron dad-on sa Dumanjug Police ang suspek.

Si Oyngorin gikatakdang pasakaan og kasong unjust vexation ug acts of lasciviousness karong adlawa. (/EIM) (BANAT NEWS)