Liog sa negosyante giluglog
CEBU, Philippines - Patay nang nakaplagan ang usa ka negosyante human kini gituohang gitulis sa wala pa dunggaba sa tulo ka mga suspek sa miaging adlaw sa Barangay San Isidro, Asturias.
Si Generoso Juntong, 68, molupyo sa maong lugar, nagbuy-od na nga napuno sa dinunggaban ug wala nay kinabuhi diha sa usa ka tampi nga adunay walo ka metros nga gilawmon.
Ang biktima matud pa nalambigit sa buy and sell nga mga hayupan ug adunay dala nga P20,000 aron unta ipangumpra adtong higayuna.
Si Generoso nananghid sa asawa nga si Lucita anang Martes nga moadto sa usa ka Gina aron mangumpra og hayupan apan wala na kini makabalik hangtod anang Miyerkules sa buntag.
Uban ni Lucita, ang kapulisan misubay sa mga lama sa dugo sa dalan paingon na sa kalibunan hangtod nga natultulan nila ang lawas ni Generoso nga adunay laslas sa liog niini. Wala na usab ang P20,000 sa biktima.
Nasikop hinuon sa kapulisan si Brian Salmorin, 19, nga taga-Sitio Udlom 2 sa hot pursuit operation mga alas 12:00 sa udto sa panimalay niini ug paingon na unta nga moikyas.
Si Brian mitug-an nga iyang maguwang nga si Bernardo Pugoy, 25, ug kaila niini nga si Alode Canuelas, 33, maoy iyahang mga uban dihang gihimo niini ang krimen.
“Paingon na unta ni moikyas kay ang duha ka at large (Bernardo and Canuelas) nag-una na man,†matud ni SPO3 Dennis Nocos, officer-in-charge sa Asturias Police Station.
Si Nocos midugang nga si Brian maoy nagdala sa kutsilyo nga maoy gigamit sa pag-gulgol sa bitkima. “Sunday evening pa ni sila gaplano nga makakwarta sila anang pagka-ugma kay naay birahan,†dugang ni Nocos. (/EIM) (BANAT NEWS)
- Latest
