Upat ka gituohang pusher og shabu nasikop
CEBU, Philippines - Upat ka mga lalaking giingong mga drug pusher ang nadakpan atol sa duha ka buy bust operation nga gipahigayon sa Regional Anti-Illegal Drug Special Operation Task Group (RAIDSOTG) ug City Anti-Illegal Drugs Special Task Group (CAIDSOTG) sa managlahing lugar sa dakbayan sa Sugbo sa milabay’ng adlaw.
Pasado alas 5:00 sa hapon sa milabay’ng adlaw si Reynaldo Torrefel, Marcelo Calvo Jr. ug Joanrey Alfeche nga mga molupyo sa Unit 2 Carbon, barangay Ermita nasikop sa grupo sa RAIDSOTG nga gipangulohan ni Senior Inspector Henrix Bancoleta diha sa ilang dapit.
Naimbargo sa mga polis gikan sa posisyon sa mga suspetsado ang 40 ka paketeng shabu lakip na niini ang usa ka pakete nga konuhay gipalit sa poseur buyer ug P500 nga gituohang halin sa ginadiling drugas.
Usa ka oras ang milabay, nasikop sa mga sakop sa CAIDSOTG si Marlon Suelto, 26, molupyo sa Puntod, Alaska, Mambaling.
Ang hepe sa CAIDSOTG nga si Senior Inspector Gerald Suquib, mipadayag nga ilang gipaubos sa surveillance si Suelto human sila makadawat og impormasyon kalabot sa giingong pagpamaligya niini og ilegal nga drugas.
Naimbargo sa mga polis gikan kang Suelto ang 121 ka paketeng shabu nga gisulod sa balonan ug P2,200 nga kwarta nga gituohang halin sa ginadiling drugas.
Ang mga suspetsado parehong mihimakak sa mga pasangil batok kanila.(/BDB) (BANAT NEWS)
- Latest
