8-anyos nga bata naanod sa sapa sa Consolacion patay

CEBU, Philippines - Usa ka 8-anyos nga batang nagduwa-duwa uban sa mga silingang bata ang gianod sa kalit nga pagdako sa bul-og sa tubig diha sa sapa sa ilang dapit sa Sityo Lumbang barangay Pulpogan sa lungsod sa Consolacion niadtong miaging Domingo sa alas 9:00 sa buntag.

Ang biktima mao si Archie Tayong, 8-anyos ug nagpuyo sa maong dapit.

Matud ni PO2 Johnaskie Romero sa Consolacion Police Station dihang nahinabi sa Banat News subay sa inisyal nga imbestigasyon ang biktima nananghid kini sa iyang inahan nga magduwa duwa sa ilang mga silingan nga bata.

Apan wala mabantayi sa ginikanan nga nangadto sa sapa ang maong mga bata ug nangaligo.

Matud pa nga ang biktima daling miambak sa sapa ug naglangoylangoy samtang diha sa daplin ang iyang mga kauban nga nagtan-aw niya ug nag-abiba.

Wala makabantay ang biktima sa kusog nga bul-og sa baha gikan sa bukid nga nagpaingon niya ug matod sa nakasaksi nakit-an pa nila ang biktima nga naggunit unta sa mga sagbot daplin sa sapa samtang naghaguros ang baha ug nakasinggit pa kini pagpangayo og tabang apan nakabuhi ug gianod.

Daling gipahibawo sa mga kaduwa niini ang ginikanan sa bata ug dali dayun kining nangayo og panabang sa mga silingan ug gipangita ang biktima apan mga alas-12 na sa udto paglabay sa tulo ka oras nakit-an ang bata apan patay na didto gidagsa sa baha sa barangay Cansaga sa Consolacion nga nasangit sa mga batobato.

Nakaangkon og mga samad ug pangos sa agtang ug lawas ang bata nga gituohang resulta sa pagkabunal-bunal niini sa kabatohan sa iyang pagkaanod. (/EIM) (BANAT NEWS)