CEBU, Philippines - Usa ka kanhi US ex-military man ang nagmaoy tungod sa kahubog ug mikulata sa iyang asawang Filipina ug giingong miuyog-uyog og maayo sa anak niining tulo pa lang ka buwang natawo diha sa duyan sud sa ilang pinuy-anan sa Eastland Subdivision sa barangay Yati, sa lungsod sa Liloan alas-7 pasado ang takna sa miaging gabii.
Ang nadakpan mao si Kyle James Hower, 25, kanhi US Army nga taga Landford, Pennsylvania sa Amerika apan nagpuyo na sa maong subdivision. Si PO3 Renato Pendo sa kapolisan sa maong lungsod miingon nga nagmaoy ang suspek gumikan sa kahubog.
Ang asawa nga si Julieta Hower, 34, misulay unta sa pagbadlong kaniya apan giingong daw wala na kini makaila ug gikulata hinuon niya kini. Sumala pa nga ang tulo pa ka bulang anak sa duha nga diha sa duyan gikatahong giuyog-uyog og maayo sa suspek hinungdan sa pagkalisang ug pagtiyabaw sa bata.
Si Eduardo Soquib, silingan sa magtiayon daling mipakalma sa maong langyaw apan giingong hasta kini giapil sa pagkulata sa suspek.
Dali nga nakatawag sa kapolisan ang asawa sa suspek nga si Julieta hinungdan sa pagresponde nila ni PO1 Alin Licciones, PO1 Christian Laureto ug PO1 Edwin Pepito kinsa maoy nagtinabangay sa paglayog niini.
Naposasan nila ni PO1 Lecciones ang maong suspetsado apan dihang didto na kini sa sulod sa ilang sakyanan kalit usab nga gipatidpatiran ang pultahan sa bag-o pa nilang mobile patrol nga nakaingon sa pagkahiwi niini.
Si PO3 Pendo miingon nga ang maong langyaw nga ilang gisulod sa detention cell ilang pasakaan og kaso nga pagpangulata sa iyang anak ug asawa, apil na ilang silingan, pagguba sa ilang sakyanan ug ang pagsukol niini sa kapolisan nga midakop niini. (/EIM) (BANAT NEWS)