2 Iranian nangalyas gidakop sa NBI

CEBU, Philippines - Duha ka Iranians ang gidakop sa National Bureau of Investigation tungod sa paggamit og alyas didto sa Toledo City.

Matud ni Regional Director Antonio Pagatpat nga sila si Hossein Malakooting alias Alex Malakooti, 30,ug Mohsen Baraghoosh alyas Rizah Baraghoosh, 28, taga  Media Onse, Toledo City nakalapas sa Republic Act 6085 (Regulating the Use of Aliases).

“For using names or aliases other than their passport names by signing the subpoena in the name of Alex Malakooti and Rizah Baraghoosh when they could affix their passport names thereof and by introducing themselves as such before the authorities, the duo violated RA 6085,” matud pa sa reklamo.

Niadtong Huwebes, ang mga ahente sa NBI pinangulohan ni Reynaldo Villordon ug representante sa Bureau of Immigration miadto sa panimalay sa duha human sila makadawat og reklamo gikan sa Provincial Women’s Commission (PWC). Ang PWC gipangulohan ni Vice-Governor Agnes Magpale nangayo og tabang sa NBI tungod sa reklamo sa usa ka a 16-anyos nga babaye nga giingong gihulga sa maong mga langyaw.

Kahinumduman nga ang babaye ni-file og kaso batok sa duha diha sa Toledo City Prosecutor’s Office tungod sa pagpanglugos niadtong Hulyo 22, 2013. Matud pang Pagatpat nga niadtong Hulyo 30, 2013 nadawat na sa mga suspek ang subpoena nga nagmando kanilang tubagon ang reklamong gisang-at sa menor de edad sud sa napulo ka adlaw.

Apan giingong bisan ang pangalan nga napatik sa subpoena dili ilang tinud-anay nga mga pangalan ug wala gani sila mohimo og lakang nga i-correct kini pinaagi sa pagbutang sa sakto nilang pangalan. Ang duha mihimakak sa pasangil sa babaye nga gi-rape nila kini. Matud pa ni Malakooting nga uyab si Bargahoosh ug ang babaye ug nahibulong na lang sila nganong gipasakaan sila’g kaso.

Matud usab nila nga migamit sila og angga kay mas dali kining litukon imbes nga ilang tinuod nga pangalan. (/EIM) (BANAT NEWS)