Fishing boat nga gisakmit sa munisipyo sa Daanbantayan gimando nga ipapauli
CEBU, Philippines - Gipapauli sa korte ang barkong panagatan nga gisakmit sa Bantay Dagat Anti-Illegal Fishing Task Force sa lungsod sa Daanbantayan dihang ilegal kini nga nanagat sa may isla sa Carnaza sa niaging buwan.
Ang tag-iya sa F/B RS-II Rojard nga si Charito Soriba miduso og mosyon sa pagkuha sa iyang barko niadtong Hulyo 31, 2013 ug ang iyang abogado nitakda sa husay sa mosyon kagahapon.
Apan si Municipal Circuit Trial Court Judge Cornelio Jaca nimando sa maong petsa pagduso sa mosyon sa pagpauli na sa barko.
“Accused is directed and obliged to produce the fishing boat whenever the court requires it to be presented,†matud pang Jaca.
Si Daanbantayan Mayor Augusto Corro mikwestiyon sa kamandoan ni Jaca sanglit makadaot kini sa iyang paghingusog sa kampanya batok sa ilegal nga panagat sa iyang lungsod.
Daling miduso og motion for reconsideration ang prosekusyon nga girepresentahan ni Piskal Samson Troy Layese kinsa mipadayag nga wala sila kadawat og kamandoan sa pagpatubag sa mosyon nga giduso sa sinumbong.
Giklaro ni Layese nga ilang supakon ang maong mosyon kung gihatagan pa sila og higayon nga mapapaminaw sa korte. Giawhag ni Layese ang korte nga himoon ang husay sa mosyon karong Agosto 6, 2013.
Mokabat sa 250 ka kilo nga nagkalainlaing isda ang nasakmit balor og kapin sa P20 mil gikan sa maong barko. Ang tag-iya sa barko ug mga tripulante niini nag-atubang na og kasong kriminal sa kapalasan sa RA 8550. (/EIM) (BANAT NEWS)
- Latest
