Mibugaw sa walo ka babaye gikasohan na

CEBU, Philippines - Gipasaka na kagahapon ang kasong kriminal sa usa ka 29-anyos nga babaye kinsa gipasanginlang mibugaw og walo ka mga babaye apil na ang mga menor diha sa lungsod sa Moalboal.

Sa gihimong inquest proceedings, si Jenvie Cabaluna lumad nga taga Moalboal, Cebu mipili nga dili moluwat og counter-affidavit kay matud niya iyahang atubangon ang kaso ngadto na sa korte.

Niadtong Domingo, si Cabaluna nadakpan sa mga sakop sa Regional Anti-Human Trafficking Task Force (RAHTTF) sa usa ka entrapment operation.

 Base sa report nga ang mga na-rescue nga babaye nagpuyo sa Danao City, Liloan, Alcantara ug Barangay Panagsama sa Moalboal.

Anaa na sa kostudiya sa Department of Social Welfare and Development (DSWD) ang maong mga babaye.

Sumala pa ni Senior Insp. Ma. Theresa Macatangay, chief sa RAHTTF nga duha ka semana nilang gihimoan og surveillance ang suspek tungod sa nadawat nilang impormasyong nagbugaw kini og mga babaye ngadto sa mga langyaw’ng guest sa mga resorts sa maong lungsod ug sa Bohol.

Apan si Cabaluna kusganong mihimakak niini ug miinsister nga iyang mga amiga ang maong mga babaye.

Ang kaso nga gipasaka sa kapulisan mao ang Republic Act 9208 as amended by RA 10364 or the Expanded Trafficking in Persons Act of 2012.

Tungod sa bag-ong balaod mahimo nang panganlan ang sinumbong. (BANAT NEWS)