CEBU, Philippines - Mga beterano sa Ikaduhang Gubat sa Kalibutan nga ania sa Sugbo nangindahay nga unta mahimoan sila og Libingan sa mga Bayani nga anha sila ilubong kun sila motaliwan na dinhi sa kalibutan.
Matud ni Koronel Manuel Segura, national president sa Philippine Veterans Association, nga garbo nila nga anha malubong sa sam-ang nga pagailhon unya nga Libingan sa mga Bayani. Usa ka gamay’ng sam-ang nga kanhi gitawag og American Cemetery diha sa dalan A. Lopez maoy gitinguha nila nga maoy madeklarar nga Libingan sa mga Bayani sa Sugbo diin ang mga nangamatay nga World War II veterans anha ilubong.
Si Acting Cebu City Mayor Edgardo Labella miuyon sa mao nga lakang ug iyang ipadali ang pagmugna og ordinansa nga maghatag og katumanan sa damgo sa mga beterano.
Si Labella miingon nga buot sa mga beterano nga mahisama sila sa ilang mga kaubanan sa Manila nga didto gilubong sa Libingan ng mga Bayani. (BANAT NEWS)