CEBU, Philippines - Paspasan pagpanakop sa mga traffic enforcers kadtong mga drayber sa passenger jeepney ug taksi nga masakpang wala magbutang og emergency assistance gadgets o kaha aduna apan depektoso.
Mao kini ang gipahibalo ni CITOM Executive Director Rafael Christopher Yap dihang nakigtagbo siya sa mga City Hall reporters kagahapon.
Matud ni Yap nga estrikto nga ipatuman sa CITOM ang gilatid sa City Ordinance 1975 nga ang tanang public utility vehicles kinahanglang magbutang gayud og suga nga kolor blue o violet ibabaw sa ilang atup.
Ang maong suga kinahanglang magkidlap-kidlap kun i-switch-on sa drayber panahon nga sila tulison o kaha adunay mahitabo nga pagpanulis nga naglambigit sa ilang pasahero.
Gipasabot ni Yap nga makatabang kaayo sa kapolisan ang maong signal devices aron sila makaresponde.
Ubos sa ordinansa, ang mga drayber o tag-iya sa sakyanan mamultahan og P1,000 kun sila masakpan nga wala magbutang niining maong kahimanan.
Nabantayan sa Banat Manobela nga hapit tanan nga mga PUJ ug taksi nga dinhi sa Sugbo duna niining maong gadget apan wala masiguro kun dili ba kini depektoso.
Matud ni Yap nga dunay mga drayber nga “ekstrador†lang sa maong sakyanan ang wala masayod kun hain ang switch sa mao nga emergency assistance devices. (BANAT NEWS)