Laing kaso vs Nigerian

CEBU, Philippines - Human napasaka sa korte ang kasong pagpamaligya og ginadiling druga pipila ka adlaw na ang milabay lain na usab nga kaso ang atubangon sa usa ka Nigerian national nga si James Okwudili Uyanneh, kinsa anaa na sa Mandaue City Jail.

Gipasaka na kagahapon sa National Bureau of Investigation (NBI)-7 ang kasong pagkupot og ginadiling druga  sa Cebu Provincial Prosecutor’s Office.

Matud ni manlalaban Bernard dela Cruz, agent on case ang kaso usa ka regular filing. Niadtong Hulyo 16, 2013 sa alas 9:00 p.m. ang mga sakop sa NBI pinangulohan ni dela Cruz misikop kang Uyanneh sa usa ka  motel sa North Reclamation Area.

Nakuha gikan kaniya ang balor P350,000 nga shabu apan sa gihimong follow up operation nga gipangulohan ni Regional Director Antonio Pagatpat naka-recover sila’g katorse ka dagkong pakete sa shabu sulod sa balay ni Uyanneh sa Yati, Liloan, Cebu nga balor og P3.5 milyones.

Matud sa live-in partner ni Uyanneh, nga si Susan Santillan nga wala siya kahibaw sa aktibidadis sa Nigerian ug boluntaryo niyang gitunol ang maleta nga kaniadto pa dili buot ni Uyanneh nga pahilabtan kaniya. Didto diay sa maong maleta gisud ang maong katorse ka dagkong pakete sa shabu, apan kini gihimakak sa langyaw nga iyaha. (BANAT NEWS)