CEBU, Philippines - Mikapin sa P20 mil ang nasakiyo sa duha ka wala hiilhing armadong mga tawo nga mitulis sa usa ka negosyante og mantika didto sa Sitio Dakit, barangay Poblacion sa lungsod sa Pinamungahan sa miaging hapon.
Ang biktima mao si Santiago Limquaeco, 75, minyo, nagpuyo sa Clarita Village sa barangay Labangon siyudad sa Sugbo ug negosyante og cocking oil.
Si PO2 Inde Nunez sa Pinamungahan Police Station mibutyag sa Banat News nga ang biktima nagdeliber og mantika sa mga tindahan nga iyang suki nga samang higayon nangolekta sa usab sa mga utangan.
Apan mihunong siya sa usa ka tindahan sa maong lugar kay iyang gihatdan og mantika, dihang sa iyang paggawas paingon sa iyang sakyanan kalit lang nga miabot ang duha ka suspek nga nagsakay og motorsiklo.
Dayon nanaog ang angkas niini ug gitionan siya sa armas de fuego ug mideklarar nga tulis.
Wala makaugpo ang biktima dihang gikuha sa suspek ang iyang pitaka ug dayong balik og sakay sa motor ug miikyas dayon pahilayo.
Midangop dayon sa buhatan sa kapolisan ang biktima sa pagpa-blotter sa maong hitabo. WC (BANAT NEWS)