CEBU, Philippines - Nagtingkagol sa karsel ang usa ka upat ka buwang mabdos uban sa iyang pag-umangkon human sila nasikop sa gipahigayong buybust operation sa mga sakop sa Provincial Intelligence Branch (PIB) sa Tajao lungsod sa Pinamungajan pasado alas 6 sa miaging gabii.
Ang mga nasikop mao silang Evelyn Birao, 33, kinsa maoy subject sa maong operasyon. Nasikop usab ang pag-umangkon niini nga si Edwin Bartolabac, 28.
Ang mga sakop sa PIB nakadawat og taho kalabot sa giingong hilabihang pagpamaligya og drugas ni Birao sa ilang dapit.
Niadtong Biyernes mihimo og operasyon ang PIB ug ilang gipalitan si Birao og P500 nga shabu, dihang gitunol niya kini diretso siyang giposasan uban ang iyang pag- umangkon nga diha usab sa maong dapit.
Matud pa ni PO3 Roderick Balili, team leader sa maong operasyon nga ang kanhi bana ni Birao anaa sa ilang listahan sa drug watchlist diin si Birao usab ang mipuli sa maong negosyo human sila magkabuwag.
Laing upat ka dagkong pakete sa gituohang shabu ug walo ka gagmay’ng pekete usab niini nga gibanabanang mobalor ngadto sa dul-an P30mil ang nakuha gikan kaniya.
Si Birao nagdumili sa paghatag og komento bahin sa iyang pagkasikop dihang gipangutana sa mga sakop sa media, samtang ang iyang pag-umangkon mipadayag nga igo lang kini (shabu) nga itagak diha kanila ug sila na lang ang mobaligya niini. (BANAT NEWS)