CEBU, Philippines - Daghang illegal structures nga hinimo lang sa mga kahoy ug kawayan nga gitukod diha sa kabaybayonan sa Barangay Mambaling ug Duljo-Fatima panggub-on kini sa mga kawani sa City Hall karong Agosto 6.
Si kanhi konsehal Jose Daluz III nga gitudlo nga maoy tsirman sa Reduction of Danger Zones in Rivers (ReDZ-R) mibutyag nga mopahigayon sila og special coastal clean up atol sa maong adlaw.
Gibisitahan nila ang maong dapit kagahapon ug nakita nga bisan lapas na sa gitukod nga seawall, dunay gitukod nga mga estraktura nga buwaranan og mga isda ug duna say mga bodega.
Nabantayan usab nila ni Daluz, Konsehal Dave Tumulak ug Raquel Arce sa Prevention Restoration Order and Beautification Enhancement (PROBE) nga daghang kabalayan daplin sa dagat nga ang pansayan direkta ra nga gitagak sa tubig. Ang gihimo sa daghang mga pamilya nakalapas sa gilatid sa balaud kay nakadugang kini sa kahugaw sa kadagatan.
Matud ni Daluz nga ang tumong sa City Hall dili ang pagguba sa kabalayan ingon man niadtong milapas na sa gihatag kanila nga lugar.
Ang mga opisyal sa City Hall nga mibisita kagahapon didto sa coastal areas sa duha ka barangay gitug-anan sa mga lumulopyo nga napugos sila sa paglabay sa ilang mga basura sa dagat kay dili moabot sa ilang dapit ang garbage trucks.
Matud ni Daluz nga pangitaan nila og sulbad ang maong mga problema nga ilang nadiskubrehan. (BANAT NEWS)