CEBU, Philippines - Usa ka maestro nga bayot ang gireklamong mimolestiya sa iyang menor de edad nga estudyante niadtong milabay’ng adlaw diha sulod sa faculty room sa usa sa mga pribadong tunghaan sa dakbayan sa Talisay.
Ang 13-anyos nga batang lalaki uban sa iyang amahan misumbong sa Women and Children Protection Desk (WCPD) sa Talisay City Police Station (TCPS) niadtong milabay’ng adlaw ug niadtong Martes napasakaan na og tukmang kaso ngadto sa piskaliya sa Talisay ang nahisgutang maestro.
Sa imbestigasyon ni PO1 Rechel Abellanosa ang bata misumbong nga human nila og duwa og basketball giingong gitawag siya sa iyang maestro ug gipakuyog siya niini ngadto sa faculty room tungod kay dunay gipatan-aw nga mga drawing books kung sa ilaha ba kadto.
Giingong pag-abot sa faculty room gipangutana sa maestro ang bata kung duna ba kini uyab apan namalibad ang tinun-an. Gisugo usab sa maestro og pakawot sa iyang likod ang bata ug human og kawot nananghid ang biktima nga pwede na ba siyang makagawas apan ang maestro daghan kini og pasumangil aron dili molakaw ang biktima.
Giingong ang suspetsado nagpasumangil usab kining nalipong ug magpahuwat sa biktima.
Ang suspetsado giingong migakos sa biktima ug nangutanang kahibalo ba kining motago og sekretong relasyon apan giingong mitubag ang bata nga dili siya ganahan makauyab og bayot. Apan bisan giunsa sa bata pag-esplikar gipugos kini sa maestro nga makighilawas kaniya dala ang pagpanghulga hinungdan nga milampos kini sa iyang dautang tinguha.
Ang maestro kansang pangalan gipugngan padayon pa karong gipangita sa kapolisan. (BANAT NEWS)