IBP-Cebu wa matagbaw

CEBU, Philippines - Wala mahimuot ang presidente sa Integrated  Bar of the Philippines Cebu Chapter nga wala maapil sa State of the Nation Address ni Presidente Benigno Aquino III kung duna kini plano sa mga reporma sa hudikatura sa nasud. Si IBP-Cebu Chapter president Elaine Bathan miingon nga naghinam-hinam unta silang makadungog kung hisgutan ba sa pangulo ang judicial reforms ilabi na ang kabahin sa kakuwangon karon sa mga hukmanan ug mga hukom.

Apan nadismaya sila nga napupos na lang dul-an duha ka oras nga SONA apan wala gyud maghisgot si Aquino sa ilang gipaabot. Sumala pa ni Bathan nga lisud sulbaron ang kurapsyon sa nasud kung huyang ang hudikatura niini.Si Aquino nanumpa nga iyang puohon ang kurapsyon ug ipasubay sa balaod ang pagpadagan sa panggobiyerno.

Gihangop hinuon sa IBP-Cebu ang paghatag ni Aquino og importansya sa edukasyon, panglawas ug ang pokus niini sa  platapormang  “tuwid na daan.” Samtang ang Secretary General sa Sanlakas Cebu Chapter nga si Theody Navea sa usa ka forum kagahapon sa buntag misaway kang Aquino sa pagpangasaba niini ngadto sa  mga ahensya sa gobiyerno nga gihulagway sa presidente nga walay nahimo.

Apan kung gisaway kini ni Navea, pipila ka mga yanong katawhan nga nagtan-aw sa SONA ang nalipay ug midayeg pa sa walay kukahadlok nga paghingalan ni Aquino sa mga ahensyang nagpabaga og nawong nga wala motrabaho sa ilang mandato.Hinuon ang mga yanong katawhan mao may gitawag ni Aquino nga iyang mga Bossing ug dili kadtong mga “utak wangwang.” (BANAT NEWS)