50 regular employees sa Danao gitaktak

CEBU, Philippines - Kapin sa 50 ka mga regular nga kawani sa dakbayan sa Danao ang gipanangtang ni Mayor Ramon “Nito” Durano III.

Ang maong mga kawani tinudlo sa administrasyon ni kanhi mayor Ramon “Boy” Durano Jr. kinsa gipilde ni Nito sa niaging eleksiyon.

Gikompirmar nilang konsehal Carmen Remedios Durano-Meca ug Jorge John Cane ang maong pagpanangtang sa mga kawani sanglit wala moagi sa proseso ang pagtudlo kanila sa kanhi mayor.

Si Meca anak ni Mayor Durano ug kasamtangang sakop sa Hunta Probinsiyal isip pangulo sa Philippine Councilors League-Cebu chapter.

“Ang ilahang appointment from the previous administration is invalid due to the fact nga wa moagi sa Personnel Selection Board,” matud pang Meca.

Si Cane miingon nga subay sa rekord sa Human Resource Management Office, sukad nilingkod si Boy isip mayor sa 2010, niadtong lang 2012 sa wala pa ang eleksiyon iyang naumol ang PSB.

Kini ang panahon nga gitudlo ang mga kawani sa mga bakanteng pwesto samtang ang uban gipasakaan ang posisyon niini.

Matud pang Meca nga ang PSB wala usab moagi sa konseho sa syudad nga maoy gimando sa Local Government Code. Dili maayo ang relasyon sa magsoong Durano sa niaging administrasyon.  Matud pa ni Meca nga sa dihang nilingkod na ang iyang amahan isip mayor, didto ilang nasuta nga ang mga bakanteng posisyon gihulipan na bisan walay pagtugot sa konseho.

Adunay mga kawani nga nangayo og rekonsiderasyon sa pagtangtang kanila samtang ang uban wala na namalik sa trabaho sumala pa ni Cane.

Gipasabot ni Cane nga kadtong gipasakaan ang pwesto gibalik sa kanhi nilang posisyon samtang ang bag-ong mga tinudlo ang wala nay trabaho.  (BANAT NEWS)