Pirmeng kasab-an kun mahubog naghikog

CEBU, Philippines - Gumikan  sa kahiubos  nga  kanunay  lang  kasab-an  sa mga  anak,  usa  ka senior citzen  napalgang  patay  nga  nagbitay  og  pisi  sa  likod  sa ilang  balay  sa sitio Sangi,  barangay  Tabunok  dakbayan  sa Talisay kagahapon  sa buntag.

Si PO1 Stephen Sefuesca  sa  Talisay City  Police Station  miila  sa naghikog  nga  si Jimmy Caballero, 61, minyo  nga  nagpuyo  sa maong  lugar.

Si Sefuesca  mitug-an  sa Banat News  nga  ang  anak  ni Caballero  kansang  ngalan  nalimtan  sa polis giingong  maoy  nakakita  sa iyang  amahan  nga  patay na nianang alas 8:00  sa buntag.

Nylon  nga pisi  ang  gihikot  sa liog  niini  ug  ang  pikas  tumoy  gigaid  sa usa  ka  sanga  sa kahoy gawas  sa ilang  balay.

Matud  pa  ni  Sefuesca  nga   ang  naghikog  magpunay  lang  og  inom  og  ilimnong  makahubog  hinungdan  nga  kanunay  usab  kining  gibadlong  sa iyang mga  anak.

Kini  tungod  sa kapikon  kun  kadali  masuko  kun  mahubog  na,  ug  dayon manghulga  nga  magpakamatay  siya   kun  kasab-an  na  sa iyang  mga anak.

Gisuwayan  pagkuha  sa Banat News  ang  hunahuna  sa  pamilya  sa naghikog  apan  wala  kini  mohatag  og pamahayag  kagahapon. (/WC)  (BANAT NEWS)