Mga motorista natanggong og upat ka oras

CEBU, Philippines - Upat ka oras natanggong ang mga sakyanan padung habagatang bahin sa Sugbo ug ang patubang sa dakbayan sa Sugbo tungod sa natumba nga usa sa mga gikonsiderar nga Century-old Trees sa Sugbo diha dapit sa Apo Cemex sa national highway sa Tinaan, dakbayan sa Naga.

Pasado alas-8 sa miaging gabii, giingong kalit lang nga milagubo ang dapit dihang natumba ang dakong punoan sa Acacia nga gibana-banang adunay gitas-on nga 25 ngadto na sa 30 ka tiil ug aduna usab kini gidak-on nga makahalog ang tulo ka tawo.

Matud pa ni Wilson Ramos sa Provincial Disaster Risk Reduction and Management Council nga dihang ilang nadawat ang impormasyon dali silang mikontak sa dakbayan sa Naga ug taga Department of Public Works and Highways kini aron makuha gilayon ang dakong kahoy nga mibabag gayud sa lukop dalan.

Tungod sa kadako niini nga nagbabag sa dalan nangita sila og laing alternatibong kalutsan sa mga sakyanan ilabi na sa mga ambulansya.

Gihimakak ni Ramos ang mikatap nga report nga usa lang ka chainsaw ang gigamit hinungdan nga nalangay kini, padayag pa ni Ramos nga tulo ka chainsaw ang gigamit.

Gipasabot niya nga nalangay sila tungod kay nangita pa sila og mga saktong gamit aron magamit pagputolputol sa maong kahoy.

Tuod man, tulo ka payloaders ug tulo ka mga chainsaw ang gigamit sa maong paghawan sa dalan.

Samtang si Engr. Daisy Toledo, sa Cebu 2nd District Engineering Office mipadayag usab nga dugay na silang nagpaabot sa cutting permit aron unta maputol ang 900 ka mga kahoy nga anaa daplin sa highway gikan sa dakbayan sa Naga ngadto na sa dakbayan sa Carcar.

"Amo recommendation from the very beginning is to remove all those tress  within the right of way, only lang wala mi makapadayun because the DENR oppose to it and also the Heritage Group. Mao na, nga naghuwat lang gyud mi og permit and I hope this will consider sa decision sa higher up. We don’t have to wait nga maingon ani unta ba,” matud pa ni Toledo.

Panghinaot ni Toledo nga unta himoong basihan sa mga mi-oppose sa pagputol sa mga kahoy nga usa ka delikado ngadto sa katawhan.

Gani, pasalamat na lamang sila tungod kay walay bisan usa nga naigo sa pagkatumba sa miaging gabii.

Samtang kasagarang reklamo sa mga natanggong mao ang kalangan ug ang kagutom, gani kasagaran nila nakatulog na lang og pinaabot ug ang uban niini nagbaklay na lang aron makaagi ug makasakay og laing sakyanan. (BANAT NEWS)