CEBU, Philippines - Tinuod kaha nga wala gayu’y sexual harassment nga gihimo ngadto sa mga babaye nga kawani sa Cebu City government?
Kini maoy gusto nga sutaon ni Konsehal Gerardo Carillo pinaagi sa pagduso niya og resolusyon nga mag-awhag sa hepe sa Human Resource Development Office sa City Hall pagsumiter sa City Council og report.
Nahinumdom si Carillo nga usa siya sa mga konsehal nga miaprobar kaniadtong Oktobre 2, 2002 sa pagmugna og Committee on Decorum and Investigation of Cases on Sexual Harassment in Cebu City government.â€
Matud ni Carillo nga sukad niadtong 2002 kon 11 ka tuig na ang nakalabay wala gyud siya makabantay nga adunay mga giimbestigar nga opisyal sa City Hall nga nakalapas niining maong balaud.
Ang Civil Service Commission maoy mihatag niini og kamandoan kaniadto nga himoan og imbestigasyon ang mga kawani nga makalapas sa Republic Act 7877, kon Anti-Sexual Harassment Act.
Giaprobahan sa mga kauban ni Carillo ang iyang awhag nga si Atty. Dominic Diño, bag-ong personnel chief sa City Hall, mopadala kanila og report kabahin sa pagpatuman sa mao nga balaud.
Ang maigo niini nga balaud mao kadtong mga superbisor, mga department head o labaw sa mga babaye nga kawani nga pugson sa pakig-date kanila bugti sa dili pagtaktak sa trabaho sa mga kaswal, o kaha saaran nga himoon sila nga mga regular sa pwesto.
Apil gani nga maisip nga salaud kun ang usa ka babaye nga kawani pugson sa pag-uban sa kalihukan panahon sa iyang trabaho sama sa disco diin hadlokon ang mga kawani nga panimaslan kun sila mobalibad. (BANAT NEWS)