OFW biktima sa laglag barya

CEBU, Philippines - Mokabat  sa  $200 ug P4,000   ang nawagtang  gikan  sa  usa ka Overseas Filipino Worker (OFW) human  kini   mabiktima sa laglag barya gang  samtang  nagsakay  og  PUJ didto sa barangay Pitogo,  lungsod sa Consolacion  kagahapon alas  10:00  sa buntag.

Ang biktima mao si Demetrio Guinita, 49,  minyo nga nagpuyo sa lungsod sa Liloan.

Gikasakay  niya  ang  tulo ka wala hiilhing mga lalaki nga pulos hamtong  ang panuigon.

Si PO2 Johnaskie Romero  sa kapolisan sa maong lungsod nga nahinabi sa Banat News miingon nga didto sakay   sa  SM, dakbayan  sa Sugbo ang  biktima .

Apan  sa pag-abot  sa highway sa  dakbayan sa Mandaue  misakay  ang tulo ka mga lalaki  ug gitaliwad-an siya sa duha ug ang ikatulong lalaki didto kini molingkod sa atbang nga lingkoranan.

Matud pa ni PO2 Romero nga giasoy sa biktima nga namatikdan  niyang  wala mahimutang ang tulo ka lalaki sulod  sa PUJ. Dihang miabot  na  sila  sa  barangay Poblacion Oriental sa lungsod sa Consolacion,  kalit lang nahulog ang sinsiyo nga tibuok P5 ug miligid   duol sa tiil  sa biktima.

Si PO2  Romero miingon nga  giiway  sa biktima  ang  iyang  mga tiil   aron    mapunit  sa  tag-iya  ang naligid nga sinsiyo. Dayon  ang  tupad nga pasahero  miapil  usab kuno  og  tikangkang  aron  dili maglisud   ang  tag-iya  sa  pagkuha  sa misaliring  niining  P5  sa hawanan  sa PUJ.

Unya  samtang  nagdagan ang PUJ ang tupad nga pasahero   sa biktima kalit lang mipahibalo  nga ang pitaka niini natagak sa yuta.

Busa  nanaug   ang  biktima  sa pagpangita sa iyang pitaka. Si PO2 Romero miingon nga nahinumdoman   sa biktima   ang gikatupad niyang  duha ka pasahero nga misampig kaniya ug iyang  gituohan   nga maoy nagsakiyo sa iyang pitaka.

Padayon  nga  gipangita  sa kapolisan  ang  maong  mga mangingilad. (/WC) (BANAT NEWS)