Dul-an 2 mil ka job order employees ang gidawat sa Talisay

CEBU, Philippines - Mokabat na ngadto sa 2,000 ang gidaghanon sa mga job orders sa city hall sa dakbayan sa Talisay ang nagsugod na sa ilang pagtrabaho bisan ang uban kanila wala pay punch cards.

Si Hazel Bathan, hepe sa human resource sa siyudad mibutyag sa mga tigbalita kagahapon nga sa iyang pagbana-bana 1,600 na ang mga JO karon sa city hall.

Gipasabot ni Bathan nga ang gi-endorso sa administrasyon karon mokabat ngadto sa 1,451 apan 1,358 lang niini ang dunay mga punch cards.

Ang mga walay punch cards gipa-log book lang una sila sa ilang pag-duty aron masweldohan unya sa ilang pagserbisyo.

Apan dunay mga JO nga wala ang mga ngalan diha sa master list nga dunay mga punch cards apan matud ni Bathan gi-endorso usab sila sa bag-ong administrasyon.

Sa 1,451 nga gidaghanon sa JO lakip na niini ang mga quota sa tulo ka konsehal nga ubos sa administrasyon 1,358 lang niini ang dunay punch card.

Ang mga walay punch card kasagaran nadestino kini sa ihawan ug garbage collection.  Matud usab ni Bathan nga ang matag konsehal duna silay 50 ka mga quota.

Ang nahisgutang unang JOs na-hire kini gikan niadtong Hulyo 1, 2013 hangtud Hulyo 15, 2013.

Ang maong gidaghanon mapun-an pa gyud kini tungod kay ang pito ka mga konsehal sa oposisyon, ex-officio ug SK Federation president gihatagan na usab kini og 50 ka quota matag usa kanila.

Sugod niadtong Hulyo 16, 2013 ang nahisgutang mga opisyal mipasulod na usab kini sa ilang mga quota.

Ang mga JO nga magtrabaho gikan sa Lunes hangtud sa Biyernes makadawat kini og P300 nga suhol matag adlaw.

Ang mga mo-duty og unom ka adlaw sa usa ka semana P253.84 ang madawat niining suhol matag adlaw samtang ang walay mga day-off og motrabaho sa tibuok semana ang magdawat og P220 nga suhol matag adlaw.

Kasagaran sa mga walay day off kadtong nadestino sa garbage collection. Ang confidential assistant magdawat kini og P500 nga suhol matag adlaw.

Ang matag JO gi-require nga moabot ngadto sa 40 oras matag semana ang ilang duty.

Kun itandi  sa milabay’ng administrasyon ang mayor duna kini 300 ka mga quota, 20 sa matag konsehal nga ubos sa administrasyon ug lima lang sa mga konsehal nga ubos sa oposisyon ug ang bise mayor dunay 46 ka mga quota. (/EIM) (BANAT NEWS)