Detective patrol system sa polis tukoron

CEBU, Philippines - Tukoron sa Cebu City Police Office ang gitawag nga Detective Patrol System (DPS)  diin ang mga beat patrol nga kapolisan magsul-ob og civilian   nga  sinina,  aron molihok isip mga intelligence sa kadalanan.

Ang hepe sa kapolisan sa dakbayan sa Sugbo, Sr. Supt. Mariano Natuel Jr, mipadayag nga tungod sa sunod-sunod nga krimen sa dakbayan  sa Sugbo ilang napanglantawan nga angayan nilang mugnaon ang DPS.

Matud pa ni Natuel nga ang maong sistema iyang gisalig ngadto sa   matag hepe sa estasyonan   sa kapolisan sa dakbayan sa Sugbo.

Dugang pa ni Natuel nga ang  beat patrol giingong ipakatap sa mga pipila ka lugar sa dakbayan sa Sugbo nga gihulagway nga crime prone areas.

Matud niya nga   kasamtangan pa nilang gisuta kun asa kining mga dapita.

Gani, aduna nay mga pipila ka lugar nga ilang nasayran nga gihulagway   nila  nga crime prone areas apan dili pa nila kini mabutyag.

Samtang gihulagway usab ni Natuel nga ang mga police nga madestino sa maong grupo giingong dili mag-unipormi tungod kay sila man maoy magsilbing intelligence sa kapolisan sa ilang tagsa-tagsa ka mga area of responsibility.

Gipadayag usab ni Natuel nga igo lang nila nga gibuhi ang kanhi gipatuman sa CCPO nga epektibo  usab . Dugang pa niya  nga kasagaran sa mga criminal,  polis ray  gibantayan, ug  kun  wala  silay  makita  nga  polis, didto  usab  sila  molihok  sa gusto  nilang  krimen  nga  buhaton. (BANAT NEWS)