70 Ka balay sa carreta demolison

CEBU, Philippines - Mga 70 ka balay nga gitukod sa pribadong yuta diha sa Sitio Mahayahay sakop sa Barangay Carreta ang gikatakda nga gub-on karong adlawa sa mga kawani nga gisweldohan sa court sheriff.

Hangtud kagahapon sa hapon wala pa maaprobahi ang Motion for Extension sa Writ of Demolition nga gimando ni MTCC Judge Pamela Baring-Uy mao nga gikulbaan na kaayo ang mga hingtungdang pamilya.

Alas otso karong buntag ang gikatakda nga pagguba sa kabalayan nga gitukod sa 800-metros kwadrados nga yuta nga gipanag-iya sa usa ka George Gimenez.

Ang mga lumulopyo sa maong yuta nga gipangulohan sa usa ka Renato Abolencia napilde sa kaso nila didto sa korte mao nga gimando sa huwes ang demolisyon sa ilang kabalayan.

Si Mayor Michael Rama Rama nahibulong nganong kagahapon lang midangop sa iyang opisina ang hingtungdang mga lumulopyo aron mangayo’g tabang.

Gimandoan sa mayor si Collin Rosell nga maoy pangulo sa Division for the Welfare of Urban Poor (DWUP) nga atimanon ang problema sa maong mga tawo.

Kun wala aprobahi ang Motion for Extension nga gisumiter sa mga lumulopyo didto sa korte kagahapon, ang paglaum nila mao ra ang uwan aron dili maguba ang ilang kabalayan.

Ubos sa lagda nga gilatid sa Presidential Decree 7279 nga walay demolisyon nga ipahigayon kun mag-uwan. (BANAT NEWS)